Эрээнтэй бараантай эргэх хорвоогийн нэгэн өнгө төрх болж, цэл залуу насаа жолооч хэмээх эрхэм алдраар гоёсон  Хэнтий аймгийн Биндэр сумын уугуул О.Бат-Оргилтой ярилцлаа. Тэрбээр өргөн хэрэглээний бараа бүтээгдэхүүн, хоол хүнс, хүний амьдралд хэрэгцээтэй бүхий л зүйлсийг сумын иргэддээ нийлүүлж, хот хооронд зорчдог нэгэн юм. 

-Танд энэ өдрийн мэндийг хүргэе. Манай уншигчдад өөрийгөө танилцуулахгүй юу?

-Сайн байна уу. Энэ ярилцлагыг уншиж байгаа бүх хүмүүст энэ өдрийн мэндийг дэвшүүлье. Намайг О.Бат-Оргил гэдэг. 25 настай. Ам бүл гурвуулаа эхнэр охин хоёртойгоо амьдардаг. Эхнэр маань бага ангийн багш мэргэжилтэй. Харин би жолооч, хот хооронд  явж ачаа, бараа ачдаг юм аа.

-Та хамгийн анх хэзээ жолоо барьж сурсан бэ? Хот хооронд зорчоод хэдий хэр хугацааг өнгөрүүлж байна. 

-Надад хамгийн анх өвөө маань машин барихыг зааж байсан. УАЗ 69 машин барьж байлаа. Албан ёсоор 2019 онд жолоочийн үнэмлэхээ аваад 20 оноос хот хооронд явж эхэлсэн. Анх суудлын машинаар хүн авч явдаг байсан. Жил гарны өмнөөс л микрогоор ачаа бараа тээвэрлэж эхэлсэн дээ.

-Улаанбаатар хотоос Биндэр сум хэдэн км билээ?

-Манай сум Улаанбаатар хотоос 400 км байдаг. 280 км нь засмал зам үлдсэн нь шороон зам. Өнгөрсөн намар 60 км засмал зам ашиглалтад орж амар болоод байгаа  юм. Өмнө нь бол тал зам нь засмал, тал зам нь шороо байлаа.

-Та ажлаа байнгын амралтгүй хийдэг үү?

Тэр мэдээж. Төрийн албан хаагч, оффисын ажилтан шиг цагийн хуваарь гэж байх биш. Хүссэн үедээ байнгын л нааш цааш явна шүү дээ. 

-Хол замд явахад хамгийн хэцүү зүйл нь юу байдаг вэ?

-Жолооч хүний хамгийн том дайсан бол нойр. Би хэлж байсан даа анх суудлын машинаар хүн авч явдаг байсан гээд. Янз бүрийн ааш авиртай хүмүүс байна. Тэгэхдээ арга эвийг нь олоод л явдаг байсан. Хамгийн хэцүү зүйл бол нойргүйдэл.

Би өөрийнхөө хувийн эрх ашгийг бодоод, хэдэн төгрөг илүү олохоо бодоод, өдөр шөнөгүй нойргүй явж  болох ч нойрмоглож яваад янз бүрийн муу зүйл тохиолдвол яана, эрдэнэт хүмүүсийн алтан амийг алган дээрээ авч яваа маш том хариуцлага надад бий шүү дээ. Ийм л том хариуцлага үүрч явдаг юм даа.

Харин истанатайгаа дэлгүүрийн бараа ачдаг болсноос хойш Улаанбаатар хотоос байнга орой гарна. Үүнийгээ дагаад эрсдэлүүд ч нэмэгддэг. Шөнө явахад мэдээж маш хүндрэлтэй. Өөдөөс зөрж байгаа жолооч бүр гэрлээ шилжүүлээд явна гэж байхгүй.  Замд аваар осол ч их гарсан байдаг. Бас байгалийн давагдашгүй хүчин зүйлс ч нөлөөлнө.

-Аа харин эсэргээрээ энэ ажлыг хийхэд таныг хамгийн ихээр аз жаргалтай болгодог зүйл юу вэ?

-Энэ л миний сонгосон зам, амьдралын зураглал учраас энэ ажлаа хийж байхад л аз жаргалтай. 

-Та хаанаас бараагаа ачдаг вэ? Бас бараа ачих үйл явц процессоо хуваалцаач?

-Нарантуул захаас бараагаа ачдаг. Өглөө зах руугаа орж машинаа байрлуулаад машин дотроо нойроо авч байтал, өдөр эхнээсээ дэлгүүрийн бараанууд маань ирдэг дээ. Сумын дэлгүүрийнхэн ачуулах бараагаа нарантуул захын гэрээт лангууны хүмүүс рүүгээ яриад миний машин руу хүргүүлнэ. Тэгээд л би чинь ачаануудаа дэлгээд суунадаа. Өдөржин юм болно оо. Ачсаар байтал орой болдог.

-Энэ хугацаанд гаргаж байсан хамгийн том бүтэлгүйтэл, ер мартагддаггүй дурсамж гэвэл?

-Болж бүтэхгүй саад тотгор зөндөө л гардаг. Ерөөсөө мартагддаггүй хөгжилтэй гэвэл нойрондоо дийлдээд сумын төв ороход 50,60 км үлдсэн байсан юм. Сүлжээгүй газар ч таарч. Шууд л унтаад өгсөн. Нэг сэрсэн нар тээр дээр гарчхаж. Би ч сэрсэн даруйдаа шууд хөдөллөө. Сум руу дөхөөд ирсэн зөндөө дуудлага ирсэн мэдэгдэл ар араасаа ёон ёон гээд л ирж байна аа. Эхний дэлгүүрийн бараагаа буулгаад дараагийн дэлгүүр дээрээ очсон дэлгүүрийн эзэн эгч бөөн уур. Чи чинь яасан сонин юм бэ? Утас шөрмөсөө авахад яадаг байна. Өнөөдөр хүүхдийн үсний найртай ширээ засах юм нь чамаар ирсэн гээд л нүүр нүдгүй загинуулж билээ. Энэ л санаанаас гардаггүй юм даа.

-Та чөлөөт цагаараа юу хийх дуртай вэ?

-Би чөлөөт цагаараа сагс тоглох дуртай, миний хамгийн хайртай спорт. Байнга жолооны ард сууж явдаг хүнд чинь хаа нэг заал аваад найзуудтайгаа хөлсөө гаргах гоё шүү.

Бас аялах дуртай. Зун болгон Монголынхоо үзэсгэлэнт газруудын сайхныг эхнэр охинтойгоо тольдоно гэсэн бяцхан зорилго бий.

-  Та цаашид ч энэ ажлаа хийх үү?

-Мэдээж хийнээ. Тэгээд яваандаа хураасан хэдээрээ хувийн бизнесээ эхлүүлнэ. Хажуугаар нь хот хоорондоо явсаар байх болно.

-Манай сайтаар дамжуулан хайртай дотны хүмүүстээ хэлмээр байгаа зүйлээ хэлээрэй гэвэл.

-Хамгийн түрүүнд ээждээ баярлалаа гэж хэлмээр байна. Ийм сайхан залуу болгож өсгөж хүмүүжүүлсэн. Энэ бүх замналын эхлэлийг тавьж өгсөн өвөөдөө талархлаа илэрхийлэх нь зүйтэй. Сайн яваа эр хүн бүрийн ард сайн хань ижил байдаг гэдэг. Миний бяцхан хувилбарыг гаргаж өгсөн, ханьдаа зөндөө их хайртай шүү. Ам зөрж, хаа нэг муудахыг алийг нь тэр гэхэв уурлуулж гомдоодогт минь уучлаарай.  Аавын хөөрхөн гүнжээ, амьдралд минь утга учир болж ирсэн хамгийн том бэлэг минь. Аав нь хязгааргүй их хайртай шүү.

Мэргэжил нэгт ахан дүүс минь холын замд хүний мөс чанараа гаргаж, үнэн сэтгэлээр ханддаг та нартаа баярлалаа гэж хэлэхгүй бол алдас болох биз ээ. Өрөөсөн дугуй минь болж дутууг минь нөхдөг дөө та нар минь.

-Цаг гарган ярилцсанд баярлалаа.

Б.Туяамарал