Хүнс, хөдөө аж ахуй, хөнгөн үйлдвэрийн сайд Ж.Энхбаяр Ургамал газар тариалангийн эрдэм шинжилгээний хүрээлэнгийн улаанбуудайн супер элит үр үржүүлгийн талбай болон тэжээлийн таримлын сорт сорилтын үйл ажиллагаатай газар дээр нь танилцаж, судалгааны багийн ажил, туршилтын үр дүнгийн талаар мэдээлэл авлаа.

          Тус хүрээлэнгийн эрдэмтэн, судлаачид энэхүү ажлын хүрээнд таримлын тариалалтын бүс нутгийн онцлогт тохирсон технологийн зөвлөмжийг боловсруулж, улаанбуудайн “Дархан-144”, вандуйн “Баялаг” сортын элит үрийг тариалангийн аж ахуйн нэгжүүдэд нийлүүлэхээр бэлтгэл хангаж байна. Энэ нь үрийн чанарыг сайжруулах, ургацын хэмжээ, тогтвортой байдлыг нэмэгдүүлэхэд чухал ач холбогдолтой юм.

Мөн Хүнс, хөдөө аж ахуй, хөнгөн үйлдвэрийн яамны захиалгаар, Азийн хөгжлийн банкны санхүүжилттэй “Хүнсний ногооны үйлдвэрлэл ба усалгаатай хөдөө аж ахуй” төсөл хэрэгжиж байгаа бөгөөд төслийн хүрээнд 400 тоннын багтаамжтай орчин үеийн үр тарианы агуулах, үрийн чанарын судалгааны тоног төхөөрөмжийг ашиглалтад оруулсан. Энэ нь үрийн хадгалалт, чанарын хяналт, судалгааны ажлын үр өгөөжийг нэмэгдүүлэх зорилготой юм.

Түүнчлэн тус хүрээлэнд арвай, тритикале, вандуй, шар буурцаг, рапс, эрдэнэ шиш зэрэг зургаан төрлийн таримлын 20 гаруй сортыг Монгол орны байгаль, цаг уурын нөхцөлд тохируулан нутагшсан сортуудтай харьцуулан судлах ажил идэвхтэй өрнөж байна. Энэхүү судалгаа нь ургамлын шинэ сортыг нутагшуулах, тариалалтын технологийг сайжруулах, уур амьсгалын өөрчлөлтөд дасан зохицох чадамжийг нэмэгдүүлэхэд чиглэж байгаа билээ.

ХХААХҮ-ийн сайд Ж.Энхбаяр газар тариалангийн судалгаа, шинжилгээний ажлыг хувийн хэвшлийн оролцоотой, хамтын түншлэлийн хүрээнд хэрэгжүүлэхийн ач холбогдлыг онцолж, тариалангийн аж ахуйн нэгжүүдэд шинжлэх ухаанд суурилсан технологийн зөвлөмж, инновацийн шийдлийг нэвтрүүлэхэд төрөөс бодит дэмжлэг үзүүлэх шаардлагатай байгааг тэмдэглэлээ.