Өнөөдөр “ГАМШГИЙН ЭРСДЭЛИЙГ БУУРУУЛАХ ОЛОН УЛСЫН ӨДӨР” тохиож байна. Энэ жил энэ өдрийг “Санхүүжилтийг гамшгийг даван туулах чадавхыг бэхжүүлэхэд чиглүүлье” уриан дор тэмдэглэн өнгөрүүлж байна. Сүүлийн жилүүдэд уур амьсгалын өөрчлөлт, байгалийн гамшгийн давтамж нэмэгдэж байгаа учраас гамшигт тэсвэртэй тогтолцоо буюу үндэсний сөрөн тэсвэрлэх чадавхыг нэмэгдүүлэх нь Монгол Улсын хувьд нэн тэргүүний зорилт болоод байгааг салбарынхан онцоллоо.

ГАМШГИЙН ЭРСДЭЛИЙГ БУУРУУЛАХЫН ТУЛД САНХҮҮЖИЛТИЙГ НЭМЭГДҮҮЛЖ ЧАДАВХЫГ БЭХЖҮҮЛЭХ НЬ ЧУХАЛ ЮМ

Гамшгийн эрсдэлийг бууруулах олон улсын өдрийг анх 1989 онд НҮБ-ын Ерөнхий Ассамблейн шийдвэрээр тунхаглаж,  жил бүр тэмдэглэхээр болсон.  Сүүлийн жилүүдэд гамшиг, осол аюулт үзэгдлийн давтамж нэмэгдэж, дэлхий нийтээр энэ чиглэлд түлхүү анхаарч байна. Судалгаагаар сүүлийн 10 жилийн дундаж үзүүлэлтээр гамшиг осол аюулт үзэгдлийн улмаас дэлхийн улс орнууд  жилд 303 тэрбум ам.долларын шууд хохирол амсаж байгаа бол шууд бус хохирол  нь  11 дахин их  буюу 2.2 тириллион ам доллар болж өсжээ. Тиймээс гамшгийн эрсдэлийг даван туулахын тулд санхүүжилтийг нэмэгдүүлэх, гамшиг болсон хойно биш өмнө нь урьдчилан сэргийлдэг тогтолцоог бэхжүүлэх нь чухал тухай ОБЕГ-ын эрсдэлийн удирдлагын газрын дарга Баасансүрэн ярьж байна.

Д.БААСАНСҮРЭН ОБЕГ-ЫН ЭРСДЭЛИЙН УДИРДЛАГЫН ГАЗРЫН ДАРГА, ХУРАНДАА "Монгол Улсын Засгийн газраас үндэсний сөрөн тэсвэрлэх чадавхыг бэхжүүлэх бодлогыг шат дараатайгаар хэрэгжүүлж, гамшгийн эрсдэлийг бууруулах, урьдчилан сэргийлэх, бэлтгэл бэлэн байдлыг хангахад чиглэсэн олон талт арга хэмжээг хэрэгжүүлж ирсэн. Тухайлбал, 2021 онтой харьцуулахад техник, тоног төхөөрөмжийн хангалт 31.5 хувиас 44.5 хувь, аврах ажиллагааны багаж хэрэгслийн хангалт 44.8 хувиас 63.6 хувь, тусгай зориулалтын хувцас хэрэгсэл 37.4 хувиас 62.4 хувь, гал унтраах багаж хэрэгсэл 38.9 хувиас 63.3 хувь, холбоо, зарлан мэдээллийн тоног төхөөрөмжийн хангалт 20.2 хувиас 48.8 хувь хүртэл өссөн үзүүлэлттэй байна" гэв. 

С.АМАРСАЙХАН МОНГОЛ УЛСЫН ШАДАР САЙД "Цаашид Монгол Улс гамшгийн эрт зарлан мэдээлэх нэгдсэн тогтолцоог бэхжүүлэх, сөрөн тэсвэрлэх чадавхыг нэмэгдүүлэх чиглэлд олон улсын байгууллага, түншүүдтэй хамтран төсөл, хөтөлбөрүүдийг хэрэгжүүлэхээр зорилт тавин ажиллаж байгааг салбарын сайд онцолж байлаа.  Энэхүү бодлогыг хэрэгжүүлэхэд зөвхөн Онцгой байдлын байгууллага гэлтгүй иргэд, аж ахуйн нэгжүүд, төрийн болон төрийн бус байгууллагуудын оролцоо, хамтын ажиллагаа чухал юм. “Гамшгийн эрсдэлийг бууруулах олон улсын өдөр”-ийг тэмдэглэн өнгөрүүлэх нь бидэнд зөвхөн өнөөгийн нөхцөл байдлаа үнэлэх бус, ирээдүйд учирч болзошгүй эрсдэлийг урьдчилан харж, түүнд бэлтгэх хамтын хариуцлагыг нэмэгдүүлэх онцгой ач холбогдолтой" гэв.