Уншигч та бүхэнд "Амралтын өдрийн жор" булангийн өнөөдрийн дугаарт Пиццан паста хийх жорыг хуваалцаж байна.  

Пастагаа төрөл бүрийн дуртай соусаараа хийгээд, нэг удаагийн хэвэнд хийж хөлдөөнө. Ингээд л завгүй, ядарсан, хоол хиймээргүй үедээ ажлаасаа ирээд, бэлдсэн пастагаа шарах шүүгээндээ хийгээд л оройн хоол бэлэн боллоо.

Жич: 0С-с доош температурт бактери үржихгүй, идэвхгүй болдог тул хөлдөөхөд ямар ч асуудал байхгүй (МХЕГ-аас өгсөн дэлгэрэнгүй мэдээллийг эндээс).

Тайлбар:
х.х – хоолны халбага 15мл
ц.х – цайны халбага 5 мл
Жич: Энэхүү жороор 26х11см хэмжээтэй 4 хэв паста пицца болох бөгөөд нэг хэв нь 4 хүний порц болно.

Орц:

Пенне паста – 800 гр
Ургамлын тос – 1 ц.х 
Сонгино – 1ш
Сармис – 3 хумс
Үхрийн татсан мах – 500 гр
Давс, перц – амтлахаар
Томатны соус – 2 лааз
Ус – 1 аяга хүртэл
Базилик – амтлахаар
Пармезан бяслаг – 100 гр
Моцералла бяслаг – 400 гр
​Хийх заавар: 
1. Пастагаа давстай, буцалж буй усанд хийж болгоно. Паста өсөлт ихтэйгээс гадна, ус их уудаг тул ахиухан устай хийгээрэй. Пастагаа дутуу болгох буюу нилээн зажлууртай байхад нь гаргана.
2. Ургамлын тосонд зөөлөн галаар сонгино, сармисаа шаргалтуулна.
3. Үхрийн татсан махаа нэмээд, галаа ширүүн дээр нь тавьж, давс, перцээр амтлан хуурна.
4. Мах бүхэлдээ борлоход нь томат соус, базиликаа нэмээд, сайтар хутгана. Томат соус хэр өтгөн байхаас хамаарч усаа /паста болгосон ус байвал бүр сайн/ тааруулан нэмнэ. Паста соус их уудаг тул соус их байна гэж санаа зоволтгүй.
5. Томат соусаа нэмээд 5 минут буцалгасны дараа соусаа дутуу болгосон пастандаа нэмж, сайтар холино.
6. Нэг удаагийн хэвэндээ пастагаа жигд нимгэн тарааж өгнө.
7. Пармезан, моцералла бяслагуудаа мөн пастаны нимгэн давхарга дээрээ нэмнэ.
8. Дахин нэг пастаны давхарга нэмнэ.
9. Дахин нэг бяслагны давхарга нэмээд боллоо.
10. Ингээд шууд шарах шүүгээнд 180С температурт 20 минут болгоод иднэ. Энэ тохиолдолд энгийн хэв ашиглаж болно.
11. Эсвэл хүнсний скочоор завсаргүй болтол нь скочдоод хөлдөөж болно. Хөлдөөгчнөөсөө гаргаад, урьдчилж халаасан шарах шүүгээнд 180С-т тунгалган цаасаар таглаад 45 минут, тунгалган цаасаа аваад 15 минут шараад боллоо.