Монгол Улсын Ерөнхийлөгч У.Хүрэлсүх, Хүнс, хөдөө аж ахуй, хөнгөн үйлдвэрийн сайд Ж.Энхбаяр нар үндэсний манлай үйлдвэрлэгч “Жүр Үр” ХХК-ийн үйлдвэрийн үйл ажиллагаатай танилцлаа.

Монгол Улсын Ерөнхийлөгчийн санаачилсан, ХХААХҮЯ-наас хэрэгжүүлж буй “Хүнсний хувьсгал” хөтөлбөрийн хүрээнд хүнсний хангамж, аюулгүй байдлыг хангах зорилгоор 53 шинэ үйлдвэр улсын хэмжээнд байгуулагдаж байгаа бөгөөд тэдний нэг нь олон улсын стандартад нийцсэн “Жүр Үр” ХХК-ийн шинэ үйлдвэр юм. Энэхүү үйлдвэр нь “Хүнсний хангамж, аюулгүй байдал” үндэсний хөдөлгөөний хүрээнд олгосон хөнгөлөлттэй, бага хүүтэй урт хугацааны зээлд хамрагдан, нийт 10,000 м² талбай бүхий шинэ үйлдвэрийн барилгаа ашиглалтад оруулсан байна.

Шинэ үйлдвэр нь хамгийн сүүлийн үеийн дэвшилтэт тоног төхөөрөмж, автомат шугам, хяналтын системийг нэвтрүүлснээр үйлдвэрлэлийн бүтээмжийг 2-4 дахин нэмэгдүүлэх, хүчин чадлыг 50-200 хувиар өсгөх боломж бүрдүүлжээ. Тус компанийн гүйцэтгэх захирал Б.Мөнхзул хэлэхдээ “Бид хүнсний бүтээгдэхүүнээ бүрэн дотооддоо үйлдвэрлэж, чанар, эрүүл ахуйн шаардлага хангасан амт чанартай бүтээгдэхүүнийг хэрэглэгчдэдээ хүргэх зорилго тавин ажиллаж байна” хэмээн онцоллоо.

“Жүр Үр” ХХК нь Монголын хүнсний үйлдвэрлэлийн салбарт 27 жил тасралтгүй үйл ажиллагаа явуулан, цар хүрээгээ тэлж байгаа үндэсний манлай үйлдвэрлэгч юм. Одоогоор тус компани 300 гаруй харилцагчаар дамжуулан, 40 гаруй төрлийн бялуу, 140 гаруй нэрийн амттан, талх, нарийн боов хэрэглэгчдэдээ тогтмол нийлүүлж байна. Шинэ үйлдвэрийн бүтэц, зохион байгуулалт нь хүнсний аюулгүй байдлын олон улсын стандартын шаардлагад бүрэн нийцсэн байна.

Монгол Улсын Ерөнхийлөгч У.Хүрэлсүх хүнсний аюулгүй байдлыг хангах нь үндэсний аюулгүй байдлын нэг чухал бүрэлдэхүүн хэсэг. Хүнсний үйлдвэрлэлээ дотооддоо хөгжүүлж, иргэдээ эрүүл, чанартай хүнсээр хангах нь төр, хувийн хэвшлийн хамтын зорилго гэдгийг онцлон тэмдэглэв.

ХХААХҮ-ийн сайд Ж.Энхбаяр салбарын бодлогын хүрээнд хүнсний үйлдвэрлэл эрхлэгчдийг санхүүгийн болон технологийн дэмжлэгээр хангах, экспортын чиглэлд өрсөлдөх чадварыг нэмэгдүүлэх талаар дэмжиж ажиллахаа илэрхийллээ.