Монголчууд төдийгүй гадна дотнын зочид гийчдэд монгол хоол, ундаагаар үйлчилгээ үзүүлж нэр алдраа цуурайтуулж яваа "Номадс" сүлжээ рестораны хамт олны бүтээл болох Домогт нүүдэлчдийн давтагдашгүй жор уриатай "Уламжлалт ба орчин цагийн Монгол хоолны 99 жор" номыг танилцуулж байна. Энэхүү ном нь хоёр цуврал бөгөөд нэг цувралд 99, нийт 198 жорыг багтаажээ.
Эл номын редактороор МУИС-ийн хүндэт доктор, процессор Ч.Онгоодой ажиллажээ. Тэрбээр номын талаар "Уламжлалт ба орчин цагийн Монгол хоолны 99 жор" хэмээх энэ ном Уламжлалт Монгол хоолны жор, технологийг хөндөж, цаасан дээр буулгаж байгаа бүтээл гэдгээрээ анхдагч ч байж мэднэ. Дэлхийн улс орнууд өөр өөрийн брэнд хоолтой. Монголчууд бид бие даасан бичиг соёлтой шигээ үндэсний уламжлалт брэнд хоолтой байх ёстой. Тийм брэндүүд манайд тоочиж барамгүй олон" гэжээ.
"Уламжлалт ба орчин цагийн Монгол хоолны 99 жор"-1
"Уламжлалт ба орчин цагийн Монгол хоолны 99 жор" нэгдүгээр ботийг дараах байдлаар долоон бүлэг болгож 99 жорыг багтаасан байна.
- Тураг махан Бүхэл битүү хоол
- Тураг махан шөлтэй хоол
- Толгой шийр, гэдэс дотороор хийсэн хоол зууш
- Дотор махан шөлтэй хоол
- Сүү, цагаан идээ, ногоотой хоол
- Аяганы хийц
- Загасан хоол
Мөн хоолны жороос гадна номын хуудас бүрт тухайн хоол болон Монгол уламжлалтай холбоотой мэдүүштэй зүйлүүдийг тайлбар маягаар оруулж өгсөн байна. Тухайлбал, хорхогны жор дээр "Нүүдэлчин монголчууд мах боловсруулж иддэг олон аргатай байв. Үүнд улайсгасан чулуугаар болгодог арга орно. Улайсгасан чулуунуудын хооронд хавчиж болгодгийг нь хавчаахай, туламласан маханд хийж болгодгийг нь боодог, улайсгасан чулуугаа тогоо савтай зүйлд хийж битүү чанадгийг нь хорхог гэнэ" хэмээсэн байна.
"Уламжлалт ба орчин цагийн Монгол хоолны 99 жор"-2
Харин "Уламжлалт ба орчин цагийн Монгол хоолны 99 жор" хоёрдугаар ботийг дараах байдлаар таван бүлэг болгож 99 жорыг багтаажээ.
- Цагаан идээ, зоог - Энэ бүлэгт ээдэм хийх, бяслаг шахах, тараг бүрэх, сүүн бяслагтай шөл зэргийг хийх жоруудыг багтаажээ.
- Шар идээ, зоог - Өрөм загсаах, хайлмар хайлах, цөцгийтэй чангаамал, өрөмтэй амттан, цагаан төмс будаатай өрөм хийх жорууд буй.
- Ногоон идээ, зоог - Үүнд, сүлжмэл боорцог, шанзтай саран боорцог, ногооны бөөрөнцөг, цайнууд зэргийг оруулжээ.
- Улаан идээ, зоог - Ямааны боодог, давхар хайс, дархад банш зэрэг махан хоолнуудыг энэ бүлэгт ангилжээ.
- Хар идээ, зоог - Шимийн архи, ундны ус, хоолны давсийн талаар энэ бүлэгт тэмдэглэжээ.
Энэхүү номын төгсгөл хэсэгт Орчин цагийн монгол хоол, цагаан хоолнуудыг жоргүйгээр оруулж өгсөн нь нэгдүгээр ботиосоо онцлог байна.
Сэтгэгдэл (2)