Монгол орны цөлжилттэй бүс нутагт 100,000 мод тарьж, “MONGOLZ #1” гэх үг бүтээх төслийн ажил үргэлжилсээр байна.
Өнөөдрийн байдлаар 447.8 метр хэмжээстэй “M” үсгийн хэсэгт модны суулгалтыг гүйцэтгэж, усалгааны системийг угсарч дуусгасан байна.
The MongolZ Esports Organization болон Shambala2056 нар хамтын ажиллагаагаараа цөлжилттэй бүс нутаг Дорноговь аймаг, Эрдэнэ сум, Ар цацын ус гэх газар 100,000 тарваган хайлаас мод тарьж, 'THE MONGOLZ #1' гэх Land Art үг бүтээхээр ажиллаж байгаа.
Тарваган хайлаас буюу Ulmus pumila гэх энэ модны төрөл Говь нутгийн хуурай, хатуу ширүүн уур амьсгалд тэсвэртэй бөгөөд 8-12 метр хүртэл өндөр ургаж, 100-200 жил насалдаг байна
.Энэхүү төсөл нь цөлжилтийг сааруулах, биомассын хэмжээг нэмэгдүүлэх, мөн түүнчлэн Зүүн Хойд Азийн бүс нутгуудаар тархдаг шар шороон шуурганы хор хохирлыг бууруулахад тодорхой хэмжээнд нөлөөлнө.
Shambala2056 бол ногоон байгууламжийг нэмэгдүүлэх зорилготой залуусын нэгдэл юм.
Монгол улсын цөлжилттэй бүс нутгийг нөхөн сэргээх, хуурай газрын экосистемийг тэнцвэржүүлэхээр эхлүүлсэн 'Be Human', 'Art N Tech' хийгээд бусад төслүүдийн хүрээнд, Shambala2056 багийн залуус Говь нутагт 66,857 хайлаас мод тарьж, ургуулжээ.Моддын тоог NASA-гийн MODIS, ESA-гийн Sentinel-2 гэх хиймэл дагуулууд бүртгэсэн байна.
