Цас ихээр орсоноос үүдэн халтиргаа гулгаа үүсэж зам тээврийн ослын тохиолдол, дуудлага мэдээллийн тоо нэмэгдсээр байна.

Тухайлбал, улсын хэмжээнд өнгөрсөн амралтын өдрүүдээр 820 гаруй зам тээврийн ослын дуудлага мэдээлэл бүртгэгдсэн байна. Харин өнөөдөр өглөөний байдлаар 103 дуудлага бүртгэгджээ. Зам тээврийн ослын дийлэнх тохиолдол нь Улаанбаатар хотод гарсан байна.

Нийслэлийн захирагчийн албанаас давс цацагч машинуудыг цэнэглэж, шаардлагатай арга хэмжээг авч ажиллаж байгаа гэх мэдээллийг өгсөн.

Гэвч зам мөстөж, халтиргаа гулгаа үүсэж, зам тээврийн ослын тохиолдол бүртгэгдсээр байгаа юм. Улсын хэмжээнд нийт авто замын цэвэрлэгээ, засварын ажлын 70 хувийг төр, 30 хувийг хувийн байгууллага гүйцэтгэдэг байна.

Тиймээс халтиргаа, гулгаа үүссэн энэ үед манай дүүрэгт хамаарна, хамаарахгүй гэж зарим зам, талбай цэвэрлэгдэхгүй үлддэг аж.