Баянгол дүүргийн Засаг дарга Ө.Сумъяабаатар холбогдох хэлтсийн дарга мэргэжилтнүүдтэй дүүргийн 1-34 хорооны Ажлын албаныхантай бүсчилсэн байдлаар уулзах уулзалт үргэлжилсээр байна. Энэ хүрээнд 2025 оны 11 сарын 10-ны өдөр "Бичил хороолол" буюу 12, 34-р хорооны Ажлын албаныхантай уулзаж, энэ онд хэрэгжсэн ажил, гүйцэтгэл, тулгамдаж буй асуудлын талаар санал солилцлоо. Дээрх хороод нь дүүргийн хамгийн хүйтэн байруудтай бөгөөд оршин суугчдаас энэ тухай гомдол холбогдох хэлтсүүдэд байнга ирдэг. Иймд 2025 онд бичил хорооллын нийт 5 байрны 15 орцны фасад дулаалгын ажлыг ДТХО-аар хийж эхэлсэн ба өнөөдрийн байдлаар гүйцэтгэл 90 орчим хувьтай байна. Уг нь дээрх байрны фасад дулаалгын ажлыг энэ онд дуусгах төлөвлөгөөтэй байсан ч гүйцэтгэгч талаас материал болон бензин шатахууны үнэ нэмэгдсэн, дулаалгын материал тасарч хил гааль дээр удсан зэрэг шалтгаанаас үүдэн ажил удааширсан гэдгийг хэлж байгаа. Иймд ирэх онд буюу хавар энэ ажлыг яаралтай дуусгах юм. Дээрх байрнуудын хувьд 12-р хорооны 6А, 6Б байр нь 1996 онд, 34-р хорооны 5А, 5Б, 5С байр нь 1992 онд ашиглалтад орсон нийт 540 өрх, 2000 гаруй оршин суугчтай ба фасад дулаалга хийснээр гэртээ тав тухтай байх нөхцөл бүрдэж байна.Мөн Бичил хорооллыг хамгийн сайн төлөвлөлттэй гэж тодотгож болох ч 14, 15, 16, 17-р байрны орчим 230 тоосгон гарааш байсан. Иймд 2024 онд дээрх гараашуудыг буулгаж, иж бүрэн тоглоомын талбай, тохижилт, авто зогсоолыг он дамжин хийж гүйцэтгэсэн юм. Одоо ТУЛГАМДАЖ буй асуудал нь мөн л орон сууцны дулаалга бөгөөд:

• 12-р хороонд 12 байр,
  34-р хоронд 6 байр дулаалах шаардлагатай гэсэн. Мөн орон сууцны хороолол дундах зам засвар, газар чөлөөлөлт, орон сууцны дээвэр, цахилгаан шатны эвдрэл гэмтэл зэрэг тулгамдсан асуудлууд байсаар байгаа бөгөөд иймд хороодын Засаг дарга нарыг иргэд оршин суугчидтайгаа хамтран нэгдсэн төлөвлөгөө гаргаж танилцуулах, ингэснээр тулгамдаж буй асуудлыг шат дараатай шийдэж ажиллах талаар санал солилцлоо.