Өнөөдөр /2025.11.25/ Сонгинохайрхан дүүргийн нэгдүгээр хорооллын арын дэнжид байрлах 39-р хороонд төрийн болон эрүүл мэндийн анхан шатны үйлчилгээг нэг дороос хүргэх цогцолбор барилга нээлтээ хийлээ. Төрийн үйлчилгээ нэг дор төвлөрч иргэдэд ойртоно гэдэг маш чухал.
Тиймээс гурван жилийн өмнө Сонгинохайрхан дүүргийн Засаг даргаар ажиллаж байхдаа 39-р хорооны ИТХ-ын төлөөлөгч, хорооны Засаг даргатай хамт хорооны цогцолбор байр барих санааг гарган яг энэ газар дээр газар чөлөөлөлтийн ажлыг эхлүүлэн зогсож байлаа. Харин өнөөдөр цогцолбор байр сүндэрлэн босож, нээлтээ хийж байгааг харах таатай байна.
Дүүргийн 39-р хороонд хэд хэдэн том бүтээн байгуулалт өнгөрсөн хугацаанд хийгдсэн. Түүний нэг нь анх удаа дүүргийн хөрөнгө оруулалтаар нэгдүгээр хорооллыг баянхошуутай холбосон 2.1 км хатуу хучилттай авто зам тавьж ашиглалтад оруулсан.
Мөн энэ жил Улсын төсөв дээр нэг сургуулийн өргөтгөл, нэг цэцэрлэг шинээр баригдахаар төсөвт суугдсан. Тэрхүү цэцэрлэг энэ 39-р хороонд баригдахаар төлөвлөгдөн ажил хэрэг болж байгааг дуулгахад таатай байна.
Тус цэцэрлэг ашиглалтад орсноор иргэд хүүхдээ хол зөөхгүй гэрийнхээ гаднаас боловсролын үйлчилгээг авах боломжтой болох юм.
