Компанийн ерөнхий менежерийн баталсан хуваарийн дагуу төвийн салбар нэгжийн ээлжийн ажилтнуудын ажилд гарахын өмнөх эрүүл мэндийн ээлжит дотоод хяналтын үзлэг өнөөдөр буюу 2025.09.22-ний өдөр эхэллээ. Тус хяналтын үзлэг нь 2025.10.14-ний өдрийг хүртэл үргэлжлэх юм.
Энэхүү үзлэг нь ажилтны эрүүл мэндийн ерөнхий байдал (артерийн даралт үзэх, судасны цохилт тэмтрэх, амьсгалын тоо чагнах, биеийн халуун үзэх, захын судасны хүчилтөрөгчийг шалгах, шаардлагатай хүмүүст цусан дах сахарыг үзэх) болон сэтгэл зүй, сэргэг байдлыг үнэлж, эрүүл мэндийг тандах, ажлын байранд осол гэмтэл, эрүүл мэндийн эрсдэлээс сэргийлэх зорилготой.
Компанийн зүгээс 2024 оны эрүүл мэндийн хугацаат үзлэгийн мөрөөр 2025.02.04 - 2025.06.04-ний хооронд нийт ажилтныг хамруулан хяналтын үзлэг хийгдсэн бөгөөд үзлэг, шинжилгээнд илэрсэн өөрчлөлт, нарийн мэргэжлийн эмч нараас ажилтнуудад өгсөн зөвлөмжийн хэрэгжилт, цаашид анхаарвал зохих болон хяналтад авах шаардлагатай эсэхийг нарийвчлан гаргаж, заавар зөвлөгөө өгч ажилласан. Тус хяналтын үзлэгийн үр дүнд:
- ажилтан тус бүрд бүртгэл үүсгэсэн,
- эрүүл мэндийн асуумж бөглүүлсэн,
- өвчний түүх болон шинжилгээний оношилгооны дүгнэлтийг бичсэн,
- амин үзүүлэлтүүдийг хэмжсэн,
- УНТЭ-ээс ирүүлсэн эрүүл мэндийн хугацаат үзлэгийн тайлан, шинжилгээнд илэрсэн өөрчлөлт, нарийн мэргэжлийн эмчийн үзлэг дүгнэлт, өгсөн зөвлөмжийг ажилтан тус бүрт танилцуулсан,
- УНТЭ-ийн нарийн мэргэжлийн болон ерөнхий эмчийн бичсэн зөвлөмжийг хэрэгжилтийг хянасан, үнэлгээ хийж хяналтын бүлгийг тодорхойлсон,
- Эрүүл мэндийн хувьд илэрсэн өөрчлөлтүүдийг цаашид хэрхэн эмчлэх, эрүүлжих, халдварт болон халдварт бус өвчлөлөөс урьдчилан сэргийлэх, дасгал хөдөлгөөн, зөв хооллолтын талаар зөвлөгөө өгч ажиллав.
Үүний зэрэгцээ ажилтны эрүүл мэнд, хөдөлмөрлөх чадварыг хадгалах, дэмжих зорилгоор Хөдөлмөрийн яамны харьяа Хөдөлмөрийн аюулгүй байдал эрүүл мэндийн төвтэй байгуулсан санамж бичгийн дагуу 2024, 2025 онуудад шаардлагатай ажилтнуудыг тус төв рүү илгээж, эрүүл мэндийн үзлэг, шинжилгээнд хамруулан ажиллаж байгаа юм. Түүнчлэн 2025 оны эрт илрүүлэгийн шинжилгээ хийлгэх байгууллагыг сонгон шалгаруулах тендер зарласан бөгөөд ойрын хугацаанд тус үзлэг, шинжилгээнд нийт ажилтнуудаа хамруулахаар ажиллаж байна.
