“Иргэний нисэхийн үндэсний төв” ТӨХХК-ийн Гүйцэтгэх захирлын баталсан төлөвлөгөөний дагуу орон нутгийн нисэх буудлуудад “Хөдөлмөрийн аюулгүй байдал, эрүүл ахуйн нийт ажилтны сургалт” зохион байгуулж байна.
2025 оны 09 дүгээр сарын 22-26-ны өдрүүдэд “Дэглий цагаан”, “Отгонтэнгэр” нисэх буудлуудад “Хөдөлмөрийн аюулгүй байдал, эрүүл ахуйн 14 цагийн сургалт”-ыг ажлын байран дээр танхимаар болон виртуал хэлбэрээр хослуулан зохион байгууллаа.
Энэхүү ХАБЭА-н сургалт нь орон нутгийн нисэх буудлын ажилчдад аюулгүй ажиллах, ажлын байрны сөрөг хүчин зүйлсээс эрүүл мэндээ хамгаалахад зайлшгүй шаардлагатай:
- ХАБЭА-н суурь болон хууль эрх зүйн ойлголтыг өгөх;
- Мэдлэг, чадварыг дээшлүүлж, хандлагыг төлөвшүүлэх;
- Үйлдвэрлэлийн осол, хурц хордлогоос урьдчилан сэргийлэх;
- ХАБЭА-н чиглэлээр 10 сэдэв бүхий виртуал сургалтын хичээлийг хэрхэн ашиглах арга зүйг зааж сургах;
- Виртуал сургалтаар дамжуулан ажилтны ажлын байран дээрээ тасралтгүй суралцаж, хөгжих боломжийг олгоход чиглэгдсэн байна.
ХАБЭА-н 10 сэдэв бүхий виртуал сургалтыг нэвтрүүлснээр тухайн орон нутгийн нисэх буудалд шинээр ажилд орж буй ажилтныг сургалтад хамруулах, сургалтын хэрэгцээ шаардлагатай ажилтнууд ажлын байран дээрээ тасралтгүй суралцах, мэдлэгээ бататгах, давтан суралцах, аюул ослоос урьдчилан сэргийлэх зэрэг ач холбогдолтой юм.
Энэ удаагийн сургалт нь Нисэхийн сургалтын төвийн ХАБЭА-н багшлах мэргэжилтнүүд орон нутгийн нисэх буудалд очиж ажилтнуудад ажлын байран дээрх сургалтыг зохион байгуулснаараа сургалтын орон зай, цаг хугацаанаас үл хамааран сургалтын хэрэгцээг бүрэн хангах, цаашид эдийн засгийн үр ашигтай байх давуу талтай болжээ.
Сургалтын үеэр нисэх буудлуудад аюул, эрсдэлийг хэрхэн илрүүлэх, мэдээллийг хэрхэн цуглуулж, дата үүсгэх талаар арга зүйн зөвлөгөө өгч, эрсдэлийн үнэлгээ хийх болон онцгой байдал үүссэн үеийн үйл ажиллагаа, зохион байгуулалт, анхны тусламж хэрхэн үзүүлэх талаар дадлага сургалтыг хийсэн байна.
Дэглий цагаан нисэх буудал
Сургалтад Дэглий цагаан нисэх буудлын аэродромын болон холбооны инженер техникийн ажилтнууд, нислэгийн мэдээллийн ажилтан, аюулгүй байдлын үзлэгийн шалгагч нар, галын бүлгийн ахлагч, агаарын хөлгийг сумлагч авто машины жолооч, технологийн авто машины жолооч, шатахууны нярав, нягтлан бодогч, үйлчлэгч, жижүүр, хөдөлмөрийн аюулгүй байдал, эрүүл ахуйн асуудал хариуцсан ажилтан нарын 33 ажилтан хамрагдав.
Тус нисэх буудалд 2025 оны 06 дугаар сарын 12-ны байдлаар Улаанбаатар-Улаангом чиглэлд 3410 зорчигч, 41932 кг 3493 ширхэг тээш, 149 кг 8 ширхэг шуудан карго тээвэрлэгдэж ирсэн. Улаангом-Улаанбаатарын чиглэлд 3426 зорчигч, 39169 кг 19019 ширхэг тээш, 4517 ширхэг гар тээшинд аюулгүй байдлын үзлэг хийсэн.
2025 оны хагас жилийн байдлаар тус аэродромд 93/93 буюу 186 агаарын хөлөг хөөрөлт буулт үйлдэж, районы нийт 420 нислэгт бэлтгэл аэродромоор болон нислэгийн хөдөлгөөний мэдээллийн үйлчилгээ үзүүлэн ажиллаж байна.
Отгонтэнгэр нисэх буудал
Сургалтад Отгонтэнгэр нисэх буудлын хөдөлмөрийн аюулгүй байдал, эрүүл ахуйн асуудал хариуцсан ажилтан, аэродромын болон холбооны инженер техникийн ажилтнууд, аюулгүй байдлын үзлэгийн шалгагч нар, галын бүлгийн ахлагч, технологийн авто машины жолооч, цэнэглэгч авто машины жолооч, шатахууны нярав, нягтлан бодогч, үйлчлэгч, галч, харуул нарын 20 ажилтан хамрагдав.
2025 оны 06 дугаар сарын 12-ны байдлаар тус нисэх буудалд Улаанбаатар-Улиастай чиглэлд 1382 зорчигч, 12671 кг 1344 ширхэг тээш тээвэрлэгдэж ирсэн. Улиастай-Улаанбаатарын чиглэлд 922 зорчигч, 8387 кг 1748 ширхэг тээш,гар тээш тээвэрлэгдэж аюулгүй байдлын үзлэг хийсэн.
Эхний хагас жилийн байдлаар тус аэродромд 46/46 буюу 92 агаарын хөлөг хөөрөлт буулт үйлдэж, районы нийт 51 нислэгт бэлтгэл аэродромоор болон нислэгийн хөдөлгөөний мэдээллийн үйлчилгээ үзүүлэн ажиллаж байна.
