Улаанбаатар хотын төвлөрөл, түгжрэлийг бууруулах, агаар, хөрс, усны бохирдлыг шийдвэрлэх зорилгоор Баянхошуу, Шархад дэд төвүүдэд Азийн хөгжлийн банк (ADB), Уур амьсгалын ногоон сангийн (GCF) санхүүжилтээр “Улаанбаатар хотын ногоон орон сууц” төслийг нийт 60 гаруй га талбайд барихаар төлөвлөсөн. Энэхүү төсөл нийт хоёр үе шаттайгаар хэрэгжиж буй бөгөөд нийт 5000 айлын ногоон орон сууц барина.
Баянхошуу талбарын эхний ээлжийн 110 айлын ногоон орон сууцыг 2025 оны 11 дүгээр сарын 11-ний өдөр Улсын комисс хүлээн авсан.
Мөн Баянхошуу, Шархад талбарт баригдаж буй нийт 454 айлын орон сууцны барилга угсралтын ажил 70 хувьд хүрчээ.
Энэхүү төсөл нь Олон улсын EDGE стандартын шаардлагыг хангасан, эрчим хүч, дулаан, усны хэмнэлттэй, байгальд ээлтэй барилгын шийдлүүдтэй бөгөөд Олон Улсын санхүүгийн корпорациас урьдчилсан EDGE гэрчилгээг 10 дугаар сарын 23-ны өдөр олгосон байна.
