Ардчилсан Намын дарга О.Цогтгэрэл “Ардчилсан нам хөнгөхөн өөрчлөлт хийгээд зогсох боломж бий. Гэвч миний хувьд нам шат шатандаа бүрэн өөрчлөлт хийх ёстой. Энэ бол шилний цаанаас чихэр долоолгосон төдий зүйл биш, бодитой, жинхэнэ шинэчлэл” хэмээн “Нээлттэй, цэгцтэй - Ардчилсан Нам” үндэсний аяны нээлтийн үеэр байр сууриа илэрхийлсэн.
Аяны хүрээнд намын дунд шатны байгууллагууд, тухайлбал Хэрэг эрхлэх газрын ажилтнуудад зориулсан сургалт зохион байгуулж байна. Уг сургалтад 21 аймаг, 9 дүүргийн Хэрэг эрхлэх газрын дарга болон улс төрийн ажилтнууд оролцож байгаа юм. Уг сургалт нь Үндсэн дүрэм, хөтөлбөр, үүнтэй холбоотой цахим систем, санхүүгийн бүртгэл болон намын дотоод зохион байгуулалтыг Үндсэн дүрэмд нийцүүлэх журам гэх зэрэг сэдвийн хүрээнд явагдсан байна.
Ардчилсан Нам анхан шатнаасаа эхлээд дотооддоо 100 хувь өөрчлөлт хийж, аймаг, сум, дүүрэг, баг, хороо, нийслэл, Үндэсний бодлогын хороо, Улс төрийн зөвлөлийн түвшинд өөрчлөлт оруулахаар төлөвлөн ажиллаж байгааг АН-ын ЕНБД-ын албан үүргийг түр орлон гүйцэтгэгч Д.Амарбаясгаланг онцоллоо.
Энэ хүрээнд 9 дүүрэг, 21 аймаг, 330 сум дахь Ардчилсан Намын хоёр зуун мянган гишүүний шинэчилсэн бүртгэлийг хоёрдугаар сарын 1-ээс гуравдугаар сарын 10-ны хооронд орон даяар явуулахаар болжээ. Бүртгэлийг намын гишүүнчлэл, удирдлагын цахим систем болох “AN.mn” сайт болон "AN PLUS" аппликэйшнийг ашиглан цахимаар явуулах юм. Тус аппликейшн нь намын гишүүдийн шинэчилсэн бүртгэл, намын санхүү, хандив, дэмжлэг, татварын ил тод байдал, гишүүдээс судалгаа авах, санал хүсэл авах зэрэг оролцоог бүрэн дэмжих, ERP датанд суурилсан дотоод удирдлагын бүрэн зохицуулалттай юм.
