Ардчилсан намын Ерөнхий нарийн бичгийн дарга С.Баярцогт 2026 оны зургадугаар сарын 12-ны өдөр Орхон аймаг дахь Ардчилсан намын үйл ажиллагаатай танилцаж, намын гишүүд, удирдлагуудтай уулзалт хийлээ.

Тэрбээр улс төр, эдийн засгийн өнөөгийн нөхцөл байдал, Ардчилсан намын бодлого, үйл ажиллагааны талаар мэдээлэл өгч, цаашдын зорилт, хэрэгжүүлж буй ажлуудын талаар санал солилцов.

Энэ үеэр Орхон аймгийн Ардчилсан эмэгтэйчүүдийн холбооны тэргүүн Н.Азжаргал сонгогчдын боловсролыг дээшлүүлэх чиглэлээр хэрэгжүүлж буй хөтөлбөрүүд, эмэгтэйчүүдийн манлайллыг дэмжих бодлого, үйл ажиллагааны талаар танилцууллаа. Мөн Орхон аймгийн Ардчилсан намын Хэрэг эрхлэх газрын дарга Д.Энхзориг намын 2026 оны үйл ажиллагааны төлөвлөгөөг танилцуулж, хэрэгжилтийг сайжруулах чиглэлээр санал, зөвлөмж авсан бол Дэд дарга н.Доржпүрэв аймгийн намын дэргэд "Эрдэнэт хөгжил" судалгааны баг байгуулж, сонгуулийн үеэр хэрхэн үр дүнтэй ажиллах стратеги төлөвлөгөөг танилцуулав.

Уулзалтын төгсгөлд Орхон аймгийн Ардчилсан намын дарга Г.Алтангэрэл намын удирдлагууд орон нутагт ажиллаж байгаад талархал илэрхийлээд, Орхон аймгийн Ардчилсан намын хувьд төвөөс дэмжлэг хүлээхээс илүүтэй намын анхан шатны байгууллагын чадавх, бааз суурийг өргөжүүлэн бэхжүүлэхэд анхаарч, Ардчилсан намын ялалтын төлөө нягт хамтран ажиллах болно гэв.

Уулзалтаар намын дотоод зохион байгуулалт, бодлогын хэрэгжилт, орон нутгийн намын байгууллагын үйл ажиллагааг идэвхжүүлэх, гишүүдийн оролцоог нэмэгдүүлэх, цаашдын хамтын ажиллагааны талаар санал солилцов.