Прокурорын дэргэдэх мөрдөн байцаах албыг өнгөрсөн онд татан буулгаж чиг үүргийг нь АТГ-т шилжүүлсэн. Энэ шийдвэрээс болж нийгэмд багагүй хэл ам гарч, маш их шүүмжлэлийг чулуудаж байсныг та бүхэн санаж байгаа биз ээ. Гэвч шийдвэр хүчин төгөлдөр болж алба хаагчдыг шалгаж, хянаж байдаг Прокурорын дэргэдэх мөрдөн байцаах газар байхгүй болсон. Ингэснээр зарим алба хаагчдад “сайн” зүйл болж байсан ч иргэдийн хувьд асар “муу” гэсэн дүнг тавиад байсныг энд дурдах нь зөв биз ээ.

Тэгвэл уг албыг эргээд сэргээх тухай асуудал сүүлийн өдрүүдэд хөвөрч эхэллээ.  

Гагцхүү энэ албыг сэргээвэл иргэдэд таалагдах ч хууль хүчний байгууллагын зарим алба хаагчдад төдий л таалагдахгүй болов уу гэсэн хардлага нийгэмд байгаа юм. Өөрөөр хэлбэл, өөрсдийг нь шалгаж, мөрдөн байцаадаг газар татан буугдаж нэг хэсэгтээ л  дураарай дургисан алба хаагчид дээрх шийдвэрийг эерэгээр хүлээж авахгүй л  болов уу гэсэн “бор шувуу” хаа нэгтээ нисэж явааг нуух юун.

Анх Прокурорын дэргэдэх мөрдөн байцаах албыг АТГ-ын харьяанд шилжүүлэхээр болж байхад   Цагдаагийн байгууллага, АТГ хоёр булаацалдаж байна гэх шум дэгдэж байсныг та бүхэн санаж байгаа биз.

Мэдээж өөр өөрсдийн ашиг сонирхолтой байгаа учир тухайн албыг хариуцахыг хичээж байсан ч АТГ-т хамааруулсан.

Гэтэл өдгөө АТГ-ын харьяалалаас гаргаж энэхүү албыг эргэн сэргээх болвол ямар нөхдийн эсэргүүцэлтэй тулгахар нь дамжиггүй Өөрөөр хэлбэл, АТГ тийм ч амархан тавиад туучихгүй нь ойлгомжтой юм.

Гагцхүү эргэж сэргээх сонирхолтой сайд Д.Дорлигжав л энэ бүхний учрыг тайлах нь дамжиггүй. Түүний хувьд Прокурорын дэргэдэх мөрдөн байцаах албыг авах сонирхол аль аль хууль хүчний байгууллагад байгааг хамгийн тодоор хэлж байсан нэгэн.

Өөрөөр хэлбэл, анх энэ албыг татан буугдаж байхад АТГ, ЦЕГ-ын ашиг сонирхолын талаар ам нээж байсан хүн бол  Д.Дорлигжав.  Тэрбээр  “УЕП-ын дэргэдэх Мөрдөн байцаах албыг авах гэж тал талаас булаацалдаж эхэллээ. Цагдаагийн байгууллага дэргэдээ авна гэхээр нөгөө талд АТГ будаацалдаад байна. Аль аль нь хуулийн төсөл боловсруулчихсан бариад гүйж байгаа” хэмээж байсан.

Мөн тэдний ийн улайран булаацалдаж байгаагийн цаад учир шүүгч, прокурор, мөрдөн байцаагчийг шалгадаг эрх мэдлийг авах гэсэн сонирхол байгааг ч онцолж байсан билээ. Тэгвэл өдгөө өөрийн эрх мэдлээрээ энэ бүхнийг цэгцэлж хуучин хэвэнд нь оруулах төлөв ажиглагдаж байна.

Гагцхүү 2000 онд Прокурор, ЦЕГ-ын хэнд нь өгөх вэ гэж бөөн хэл ам болж байгаад УЕПГ-т харьяалуулсан тус албыг дахин хэн нь авахаа үзэж булаацалдаж байгаа олны сонирхолыг татсан хэвээр байна.  Мөн өдгөө буцаад хэвэнд нь оруулвал аваагүй талынх нь бах ханаж, алдаж байгаа талынх нь сэтгэл гонсойх нь дамжиггүй байгааг ч учир мэдэх хүмүүс хэлж байгаа юм.

24tsag.mn