Зөвлөлт-Монголын “Говь Хянганд туладдсан нь” хэмээх кинонд хамгийн анх удаа энэхүү “731 дүгээр отряд”-ын тухай цухасхан өгүүлсэн юм. Японы маш нууц энэхүү отряд 1936 онд Хятадын нутаг дээр байгуулагдсан түүхтэй. Мөн энэ отрядод Японы тухайн үедээ урдаа барьдаг эрдэмтэд ажилладаг байжээ. Хятадад байгуулсан нь ч тохиолдлын зүйл биш аж. Яагаад гэхээр туршилтын нян санамсаргүйгээр гадагшаа алдагдлаа гэхэд Японы ард түмэн хохирохгүй гэж үзжээ. Үүнээс гадна хамгийн гол нь энд туршилтын” туулай” болох Австрали, Солонгос, Хятадын армийн олзлогсод олноороо байжээ. Тэдний дундаас дээд зэргийн бие бялдарын хөгжилтэй, эрүүл саруул хүмүүсийг сонгоно. Мэд тэднийг маш сайн хооллодог байв. Гагцхүү хүн гэж нэрлэх, хэлэх, дуудахыг ажилтнууддаа хатуу хориглодог байжээ. Эдгээр хүмүүс дээр янз бүрийн туршилт хийдэг байв. Ихэвчлэн халдварт өвчний нянгаар тарина. Тэгээд ажиглалт хийнэ. Тус отрядын дарга, тэргүүлэх эмч, доктор Исийгийн хувьд тахлын нян хамгийн дуртай туршилтын нэг байлаа. Тэрбээр тусгай өрөөнд хүмүүсийг олноор нь чихэж оруулаад халдварт өвчний нян тараасны дараа дундаас нь сонгож аван хагалгаанд оруулж, түүний эд эрхтэн халдвар авч байгаа явцыг судалдаг байна. Ингэхдээ туршилтын “туулайнхаа” цээжний хөндийг яраад олон хоног ажиглах бөгөөд энэ үед туршилтад орсон хүндээ мэдээ алдуулах тариа хийдэггүй учир үгээр илэрхийлэхийн аргагүй тарчилж буй нь харагддаг байжээ.
Энэ отрядын лабораторид зөвхөн биологийн зэвсгийн туршилт хийдэг байсангүй. Тэнд хэн нэгэн дурын ажилтан ороод байдаггүй маш нууц лабораторид хүний бие организмын хамгийн дээд боломжийг судалдаг байжээ. Ингэхэд Хойд Хятадад тулалдаж байсан япон цэргүүдийн ихэнх нь хүйтнийг даах тэсвэр тун муу байсан учраас “731 дүгээр отрядын” эмч нар хүний биеийг зориудаар мод шиг болтол хөлдөөгөөд дараа нь -37,78 °С - 50 °С хүртэлх хүйтэн усанд дүрэн туршилт хийж байжээ. Ингэхдээ хөлдсөн хүний эд эрхтэн хэрхэн ээлж дараалан үхэж байгааг судалдаг байсан аж. Мөн дөнгөж төрсөн хүүхдүүд дээр ч туршилт хийж байсан баримт бий гэнэ. Тухайлбал, нялх балчир хүүхдийг хөлдөөхөд гараа инстинктээрээ атгачихаад байсан учир дунд хуруу руу нь зүү шургуулдаг байсан баримт байдаг ажээ. Ингэхэд тус отрядын эмч нар туршилтаа үүгээр хязгаарлаагүй юм. Тэд хүний гарыг тайраад хооронд нь сольж оёх, хэдэн өдөр өл даахыг нь үзэх, бүх цусыг нь аваад оронд нь адууны цус шахах зэрэг туршилтуудыг хийдэг байсан бөгөөд энэ бүгдийгээ гэрэл зураг болон кино зургийн хальснаа буулгаж, маш нарийн тэмдэглэл хөтөлсөн байдаг ажээ.
