Оросын Эх орны дайны Аугаа их Ялалтын баярын 70 жилийн ойд Монголын Зэвсэгт хүчний 80 гаруй албан хаагч оролцож, Монгол цэргийн сүр жавхааг дэлхий нийтэд харууллаа.

Ялалтын баярын жагсаалд оролцох албан хаагчдыг Зэвсэгт хүчний жанжин штаб, Хилийн цэргийн ерөнхий газрын анги нэгтгэлүүдээс сонгон шалгаруулж, бэлдсэн билээ. Сонгон шалгаруулалтад 180-185 см өндөртэй, биеийн хөгжил сайтай, зөв төрхтэй, нүүрэн тус газраа элдэв сорвигүй, цэргийн жагсаалын дүрмийг мэддэг, албандаа амжилт гаргаж, мэргэжлийн шалгуур хангасан алба хаагчдыг сонгосон.

Эх орны дайны ялалтын 65 жилийн ой буюу таван жилийн өмнөөс гадаадын орнуудын цэргүүд парад алхаж эхэлсэн юм. Улаан талбайд Монгол Улсаас гадна Хятад, Энэтхэг, Белорус, Армень, Азербайжан, Казахстан, Кыргызстан, Тажикстан, Серби гэсэн 9 орны цэрэг Ялалтын парадад жагсчээ. Хятадын баг хамгийн олон буюу 112 гишүүнээс бүрдсэн байна.

Г.Үжин