Монгол Улсын Ерөнхийлөгчийн зарлигийн дагуу улс даяар 11 дэх удаагаа “Бүх нийтээрээ мод тарих”-ийг тэмдэглэлээ. Жил бүрийн тав, аравдугаар сарын хоёрдахь долоо хоногийн бямба гарагт зохиогддог “Бүх нийтээрээ мод тарих үндэсний өдөр” энэ жил Аугаа их ялалтын 70 жилийн ой, Монгол Улсад байнгын ажиллагаатай парламент үүсэж хөгжсөний 25 жилийн ойн өдөр тохиов. Түүхт ой тохиосон энэ өдөр манай сурвалжлах баг О.Баасанхүү гишүүний санаачилж 1000 гаруй хүний бүрэлдэхүүнтэйгээр мод тарих ажлыг эхлүүлсэн Шадивлангийн аманд өнжлөө.

Мод тарих үйлсэд нэгдэхээр мянга, мянган хүн ирсэн нь Монголчууд байгаль дэлхийгээ бодож, хойч үеэ хамгаалж байгаан тод илрэл болж байлаа.

Манай сурвалжлах багийн сонгож очсон Шадивлангийн аманд Онцгой байдал, мэргэжлийн хяналтын алба хаагчид, Чингэлтэй дүүргийн оршин суугчид хийгээд МАХН-ын гишүүд, мөн сайн дурын оролцогчдоос бүрдсэн мянга гаруй хүн мод тарих уриалгад нэгдсэн байлаа.

УИХ-ын гишүүн О.Баасанхүүгийн хувьд тухайн өдөр 10 гаруй автобус хөдөлгөн дээрх тооны хүмүүсийг уриалан санаачилж мод тарих ажлыг эхлүүлээд байсан юм. Мод тарих ажилд 4 сартай хүүхэдтэй эхээс эхлээд 80 настай буурай хүртэл чин сэтгэлээсээ зүтгэж байсан нь хуран цугласан хүмүүсийн сэтгэлийг хөдөлгөж байлаа.

Ингээд  байгаль дэлхий, ирээдүй хойчийнхоо төлөө гар бие оролцож байгаа иргэдийн санал сэтгэгдлийг сонирхуулая.

УИХ-ын гишүүн О.Баасанхүү:  Модны хулгайчдын гарт өртсөн газарт 1500 мод тарилаа

Энэ тавдугаар сарын 9-нд Монгол Улсын Ерөнхийлөгчийн санаачилгаар мод тарих хөдөлгөөн гэж өрнөсөн. Энэ хөдөлгөөний дагуу миний бие Чингэлтэй дүүргийн Шадивлангийн аманд мод тарих хөдөлгөөнийг эхлүүлж байна. Манай хөдөлгөөнд 1000 гаруй иргэн оролцож байна. Хамгийн бага нь 4 сартай хүүхэд, хамгийн ахмад нь 80 настай буурай байна. Бидний хувьд эрүүл агаар, эрүүл хөдөлгөөн, байгаль дэлхийгээ хайрлаж байгаа үзүүлэлтийн нэг нь энэ юм. Иргэд маш идэвхтэй оролцож байна. Мөн онцгой байдал, мэргэжлийн хяналт, ХСИС, өмгөөлөгчдийн холбоо гэх мэт байгууллагууд оролцож байгаа. Энэ газар өмнө нь маш сайхан ой модтой байсан ч модны хулгайчдын гарт өртсөн. Үүн дээр Байгаль орчны яамнаас тусгайлсан хашаа барьж төсөл хэрэгжүүлж байгаа юм билээ. Бид  энэхүү төсөлд хамрагдаж ажиллаж байгаа юм. Одоогоор 1500 модны суулгацыг суулгалаа. Байгаль орчны шууд хяналтад, мөн ой доторх тусгай суулгацаар суулгаж байгаа болохоор ургахад хурдан байх. Түүнчлэн хоттой ойр учир иргэд суулгасан модоо эргэн харж, хянах бүрэн боломжтой юм.

Чингэлтэй дүүргийн 10-р хорооны иргэн Л.Базаррагчээ: Мод хэчнээн тарина төдий чинээ урт насална
Өнөөдөр их сайхан байна. Манай Чингэлтэй дүүргийн хамт олон Мод тарих өдрийг тохиолдуулж 1000 гаруй суулгац суулгахаар ажиллаж байна. Мод тарихад нас нэмдэг гэдэг. Дээр үед мод тарьсан хүмүүсийн нас уртасдаг гэж ярьдаг байсан. Тиймээс манай хамт олон мод тарьж байгаадаа баяртай байна. Хүн байгаль эхээс заяатай. Тийм учраас байгалиа сайн сайхан байлгахын тулд бүгдээрээ мод тарьцгаая гэж уриалмаар байна. Байгальд оршиж байгаа бүх хүн, амьтанд агаар ус хэрэгтэй. Мод агаар ялгаруулдаг учир бидний амьсгалж байгаа хүчил төрөгчийг ялгаруулдаг. Иймээс мод тарьцгаая гэж уриалж байна. Миний хувьд жил болгон мод тарьдаг. Хашаандаа хүртэл сайхан, сайхан модтой.   Энд бүх хорооноос хүмүүс ирсэн байна. Манай хорооноос л гэхэд 200 гаруй хүн иржээ.

Аврах гал унтраах аврах ангийн захирагч Б.Ганхуяг: Онцгой байдлын алба хаагчид бид байгаль дэлхийнхээ  төлөө сэтгэлээ зориулж явдаг
Манай ангиад 40 гаруй хүн ирчихсэн байгаа.  Байгаль дэлхийдээ хайргүй хүн л байгаль дэлхийгээ сүйтгэдэг. Эх дэлхий биднийг ивээж энерги хүчээ хамгаалдаг. Гэтэл модны хулгайчид сүйтгээд байдаг. Онцгой байдлын алба хаагчид бид чинь байнга л үүний төлөө сэтгэл санаагаа зориулж явдаг. Өмнө нь мод тарьж байсан. 80 гаруй хувь нь ургасан байна лээ.  Модыг яаж тарих вэ гэдгийг маш сайн судлах хэрэгтэй. Салхи авахуулахгүй сайн ургуулах чухал.

23 дугаар сургуулийн 2а ангийн сурагч С.Цэгцгүн: Өнгөрсөн жилээс эмээтэйгээ мод тарьсан
Өнгөрсөн жил эмээтэйгээ  мод тарьж байсан. Маш гоё ургасан.  Тиймээс энэ жил дахиад тарьж байна.

Өмгөөлөгчдийн холбооны зөвлөлийн ажилтан: Ц.Мөнхтуяа: Өнгөрсөн жил тарьсан моднууд сайхан ургасан.
Өнгөрсөн онд Өмгөөлөгчдийн холбоо мөн Үндэсний цэцэрлэгт хүрээлэнд мод тарьж байсан. Энэ жил мөн олон байгууллага оролцож байгаа энэ үйл ажиллагаанд нэгдлээ. Сэтгэгдэл маш өндөр байна. Өнгөрсөн жил тарьсан модоо эргэж тойрсон. Сайхан ургасан байна лээ.

Дашрамд хэлэхэд бидний сонгож очсон Шадивлангийн аманд мод тарих хөдөлгөөн бол сонгуулийн пи ар биш. Гагцхүү иргэд байгаль дэлхийнхээ төлөө дуу хоолой, хүч хөдөлмөрөө нэгтгэж эхэлсэний тод илрэл гэдгийг онцлох нь зүйтэй биз.

Д.Ундрах /24tsag.mn/