Шударга өрсөлдөөн хэрэглэгчийн төлөө газар/ШӨХТГ/-аас орон сууц өмчлөгч, эзэмшигчийн хариуцлагын даатгалын үйл ажиллагаа нь хууль тогтоомжид нийцэж байгаа эсэхийг шалгасан талаар мэдээлсэн. Энэхүү шалгалтын үр дүн олон арван иргэдийг хохироосон байж болох зөрчлүүд илэрсэн талаар ШӨХТГ-ын дарга Т.Аюурсайхан онцолсон. Хяналт шалгалтад тухайн орон сууц өмчлөгч, эзэмшигчийн хариуцлагын даатгалын чиглэлээр голлох үйл ажиллагаа эрхэлж буй “Ард даатгал” ХХК, ”Улаанбаатар хотын даатгал” ХХК, “Хаан даатгал” ХХК-иуд хамрагдсан байдаг.

“Хаан даатгал” ХХК иргэдээс тэрбум төгрөг хууль бусаар авчээ

Даатгалын тухай хуульд зааснаар орон сууцны оршин суугч нь орон сууцны хөрөнгийн болон хариуцлагын даатгал аль аль нь сайн дурын ердийн даатгалын хэлбэрт хамаарахаар байна. Гэтэл даатгалын компаниуд хэрэглэгчийн өөрийнх нь зөвшөөрөлгүй, бичгээр байгуулсан гэрээгүйгээр бүлгээр хийгдэх даатгал нэрийдлээр оршин суугчдын байрны төлбөрт шууд тооцон авч байсан зөрчил илэрчээ.

Жишээлэхэд, “Хаан даатгал” ХХК нь Орон сууц, нийтийн аж ахуйн удирдах газартай гэрээ байгуулан түүний харъяа 16 хэрэглэгчдэд үйлчлэх төвөөр дамжуулан иргэдээс даатгалын мөнгийг шууд хураан авч байсан гэнэ. Мөн “Хаан даатгал” ХХК нь хөрөнгийн болон хариуцлагын даатгалын хэлбэрээр тусгай зөвшөөрөл авч, зөвхөн орон сууцны хөрөнгийн даатгалын бүтээгдэхүүнийг зах зээлд борлуулахаар Санхүүгийн зохицуулах хороонд бүртгүүлсэн байна. Өөрөөр хэлбэл орон сууцны иж бүрэн даатгал /хөрөнгийн болон хариуцлагын даатгал хамт/-ын бүтээгдэхүүн хэлбэрээр зах зээлд борлуулахаар бүртгүүлээгүй буюу эрх олгогдоогүй байна.

Түүнчлэн “Хаан даатгал” ХХК-ийн үйл ажиллагаанд даатгуулагчийн шилжилт хөдөлгөөн нэг бүрийг хийдэггүй, даатгалын хураамжийг давхардуулан авдаг, гэрээний сунгалт болон дүгнэх, цуцлах, өөрчлөлт оруулах нөхцөлүүдийг хуульд заасан шаардлагын дагуу гэрээнд тусгадаггүй зэрэг зөрчлүүд илэрчээ.

Тус компани нь 2013-2015 онуудад 55411 өрхийг даатгалтай гэх байдлаар даатгалын төлбөрийг хэрэглэгчдээс авч байсан бол үүнээс бичгээр хийгдэж, баталгаажсан гэрээт өрхийг шалгахад 2013 онд 9354, 2014 онд 44833, 2015 онд 10557 өрх байна. Өөрөөр хэлбэл “Хаан даатгал” ХХК нь 2013 оны байдлаар 46057, 2014 оны байдлаар 10578, 2015 оны байдлаар 44854 өрхтэй бичгээр гэрээ байгуулж, баталгаажуулаагүй бөгөөд энэхүү үйл ажиллагааны улмаас 2013 онд 552.6 сая, 2014 онд 190.4 сая, 2015 оны байдлаар 269.1 сая төгрөг, нийт 1.12 тэрбум төгрөгийн хууль бус орлого олж, иргэдэд хохирол учруулсан байна.

“Ард даатгал” ХХК-ийн хувьд хууль бусаар иргэдийг хохироосон

Cууц өмчлөгчдийн холбоодтой хамтран ажиллах гэрээ байгуулсан гэх байдлаар орон сууц өмчлөгч, эзэмшигчийн хариуцлагын даатгалын үйлчилгээний хураамж /1000 төгрөг/-ийг хэрэглэгчийн өөрийнх нь зөвшөөрөлгүй, бичгээр байгуулсан гэрээгүйгээр бүлгээр хийгдэх даатгал нэрийдлээр сууц өмчлөгчдийн холбооны төлбөрийн хамт шууд тооцон авч байсан гэнэ. Түүнчлэн “Ард даатгал” ХХК-ийн үйл ажиллагаанд даатгуулагчийн шилжилт хөдөлгөөн нэг бүрийг хийдэггүй, даатгалын хураамжийг давхардуулан авдаг, гэрээний сунгалт болон дүгнэх, цуцлах, өөрчлөлт оруулах нөхцөлүүдийг хуульд заасан шаардлагын дагуу гэрээнд тусгадаггүй нь илэрчээ. “Ард даатгал” ХХК нь 2013-2015 онуудад оршин суугчдаас дээрх хууль бус байдлаар нийт 246.5 сая төгрөгийг авч, иргэдэд хохирол учруулсан байна.

“Улаанбаатар хотын даатгал” ХХК-ийн хувьд даатгуулагчийн шилжилт хөдөлгөөн нэг бүрийг хийдэггүй, даатгалын хураамжийг давхардуулан авдаг, гэрээний сунгалт болон дүгнэх, цуцлах, өөрчлөлт оруулах нөхцөлүүдийг хуульд заасан шаардлагын дагуу гэрээнд тусгадаггүй зэрэг зөрчлүүд илэрсэн мөн илэрчээ.

Иймээс ШӨТХГ-аас доорх шаардлагуудыг тавьж, хариуцлага тооцох болсон билээ. Тодруулбал,

    Нийслэлийн орон сууц, нийтийн аж ахуйн удирдах газар болон “Хаан даатгал” ХХК-ийн 2015.01.26-ны өдрийн хууль бус хамтран ажиллах гэрээг хүчингүй болгох

    Зөрчлийг арилгуулах, хэрэглэгчдэд учруулсан хохирлыг барагдуулах улсын байцаагчийн дүгнэлт, албан шаардлагыг зөрчил гаргасан “Ард даатгал” ХХК, “Хаан даатгал” ХХК, Нийслэлийн орон сууц, нийтийн аж ахуйн удирдах газруудад хүргүүлсэн.

    Албан тушаалаа урвуулан ашиглаж, хэрэглэгчдийг хохироосон Нийслэлийн Орон сууц, нийтийн аж ахуйн удирдах газрын удирдлагад хариуцлага тооцуулах, иргэдэд учруулсан хохирлыг нөхөн төлүүлэх ажлыг зохион байгуулах саналыг дээд шатны байгууллага, албан тушаалтан болох Нийслэлийн Засаг дарга Э.Бат-Үүлд хүргүүлсэн юм.

Тэгвэл энэхүү мэдээллийн дараа дээрх даатгалын компаниудаас мэдээлэлтэй санал нийлэхгүй байгааг эх сурвалж мэдээллээ. Мөн ШӨХТГ-ыг судалгаа хийх нэрийдлээр баримт гаргуулчихаад түүнийгээ гуйвуулж олон нийтэд цацаж байгаад гомдолтой байгаа аж. Харин ШӨХТГ-аас шалгалт оруулаагүй гэдгийг даатгалын компаниуд онцолжээ. Улмаар энэ асуудлаар холбогдох газруудад гомдол гаргах гэж байгаа аж.

Тэдний энэ мэдээллээс болж олон нийт ШӨХТ-ыг шалгалт оруулж, зөрчлийг бүрэн хэмжээнд судалсаныхаа дараа иргэдэд мэдээлдэггүй юм байна. Мөн авсан мэдээлэл, баримт төдий зүйл дээрээ дөрөөлж нэр хүндээ өсгөх гэж башир арга хэрэглэж байна гэх бор шувууг нисгээд эхэлжээ.

24tsag.mn