БЗД-ийн 27 дугаар хороо Сэлбийн 5 дугаар гудамжинд 2015 оны 5 дугаар сарын 12-ны 16.30 цагын орчим З настай охиныг дайрч амь насыг нь хохироож, хэргийн газрыг орхин явсан ноцтой зам тээврийн хэрэг гарсан. Улмаар Цагдаагийн байгууллагаас хэрэгтнийг шуурхай эрэн сурвалжлан тухайн хэргийг "Тоёота приүс" маркийн авто машины жолооч "Ц"-г үйлдсэн болохыг олж тогтоосон байна.

Одоогоор тухайн гэмт хэргийг Зам тээврийн гэмт хэргийг мөрдөн шалгах хэлтэс шалгаж байна.

Хүүхэд дайрч хөнөөгөөд зугтсан гэх сэжигтэний хувьд ингэж мэдүүлж байна.

Тэрбээр "Баянзүрх дүүрэгт би найзындаа очоод компьютерээс нь файл аваад хөдөлсөн. Тухайн үед нуруу, бөөр өвчтэй байснаас болж суудлаа нэлээд налж явсан. Ингээд өөрийнхөө санамсар болгоомжгүйгээс болж хүүхдийн амь насанд хүрчихлээ. Намайг уучлаарай, миний түмэн буруу.  Өөрийнхөө энэ үйлдэлт үнэхээр их гэмшиж байна. Тухайн үед намайг зогсоод амарч байхад миний машиныг тойроод хүүхдүүд тоглож байсан. Хөдлөхийнхөө өмнө тэдгээр хүүхдүүдэд болгоомжтой машинаас хол тоглохыг анхааруулаад хөдөлсөн. Хөдлөөд нэлээд явсаныхаа дараа хүүхэд дайрсанаа мэдсэн. Тухайн үед хүүхэд дайрсанаа мэдээгүй. Нэг юман дээр гараад явчих шиг болсон. Хүүхэд байна гэж огт бодоогүй. Хэрэв мэдсэн бол анхны түргэн тусламжийг үзүүлж, эмнэлэг цагдаа дуудах байсан. Цагдаагийн байгууллагаас удаа ч үгүй залгасан. Яваад очиход 3 настай хүүхэд дайрсан талаар хэлсэн. Ингээд хэргээ хүлээгээд байж байна. Жолооч нарт хандаж сэрэмж болгоомжтой байж, машинтайгаа хөдлөхөөс өмнө ойр орчмоо маш сайн ажиглаж, явган хүний гарц, хүүхэд байгаа газраар болгоомжтой явж байгаарай гэж хэлмээр байна" гэв.

Д.Ундрах /24tsag.mn/