Манай улсад 35.2 тэрбум татварын өр төлөх ёстой “Саусгоби Сэндс” компани өчигдөр Үндсэн хуулийн цэцэд ханджээ. Улсын дээд шүүхээс өнгөрсөн сард тэдний гомдлыг хэлэлцэх боломжгүй гэсэн хариу өгсөн. Компанийн зүгээс Дээд шүүхийг Үндсэн хууль зөрчсөн хуулийг хэрэглэсэн гэж үзэн ийнхүү Цэцэд өгчээ. Энэ талаар тус компанийн өмгөөлөгч Ц.Цэрэнжээ “Эрүүгийн байцаан шийтгэх хуулийн 243 дугаар зүйл ангид иргэний хариуцагч, нэхэмжлэгчгэдгийг орхисон. Дээд шүүх энэ заалтыг хэрэглэж, компанийг гомдол гаргах эрхгүй гэж үзсэн. Тиймээс Үндсэн хууль зөрчсөн хууль гэж үзэн Цэцэд хандаж байна” гэсэн тайлбарыг өгсөн байна.

Улсын дээд шүүх Эрүүгийн байцаан шийтгэх хуулийн 342 дугаар зүйлийн 342.1 –д “Шүүгдэгч, цагаатгагдсан этгээд хохирогчийн өмгөөлөгч гомдол гаргах эрхтэй” гэж хяналтын шатны шүүхэд гомдол гаргах эрх бүхий сүбьектээр нь нэрлэн заасан бөгөөд иргэний хариуцагч Саус гоби сэндс компанийн итгэмжлэгдсэн төлөөлөгч Ц.Болд, өмгөөлөгч Ц.Цэрэнжээ нар нь хяналтын шатны шүүхэд гомдол гаргах эрх бүхий этгээд биш гэсэн хариу өгсөн юм.

Т.Сар