6 дугаар сарын 10-ны үдээс хойших байдлаар БНСУ-д Ойрхи-Дорнодын Коронавирусын халдвар авсан хүний тоо 13-аар нэмэгдэж, 2 хүн нас нэмж барлаа. Нийт 108 хүн халдвар авч, 9 хүн нас бараад байна.

Есний өдрийн байдлаар 2852 хүнийг тусгаарлаж, 607 хүнийг хориог цуцлаад байна. 2208 цэцэрлэг, сургуулийг түр хаасан гэх мэдээллийг тус улс дахь манай консулын газраас ирүүллээ.

Халдвар авагчдын 10 нь 5.27-28-нд Самсунг эмнэлгийн түргэн тусламжийн хэсэгт 14 дэх өвчтөнөөс, 2 нь 5.28-30-нд Гөнян эмнэлэг, Дэчөн эмнэлэгт хэвтэж байсан 16 дах өвчтөнөөс, 1 нь 5.29-31-нд Халлим дэдогтан Сөншим эмнэлэгт хэвтэж эмчлүүлж байсан 15 дахь өвчтөнөөс тус тус халдвар авсан байна. Үүнд жирэмсэн хүн халдвар авсан анхны тохиолдол бүртгэгджээ. Эдгээрээс 98 дахь өвчтөн нь 6.3-7-нд Самсунг эмнэлгээс Сөүл Янчөн дүүргийн Мэдихил эмнэлэгт хэвтэж байгаад Мокдон эмнэлэг рүү шилжсэн бөгөөд энэ үед халдвар тарсан байх магадлалтай гэж үзэж хавьтагч нарыг тогтоож байна.

Нас барсан 2 хүн Сөүл Самсунг эмнэлгийн түргэн тусламжийн хэсэгт халдвар авсан бөгөөд өвчтөнүүд элэгний хавдар, цусны хавдрын /62 настай эр, 75 настай эм/ оноштойгоор эмчлүүлж байсан ажээ.

БНСУ –д халдвар авсан хүний тоо нэмэгдэж байгаатай холбогдуулан манай улсын Элчин сайдын яамнаас сэрэмжлүүлэг плакат хэвлүүлж иргэд олноор үйлчлүүлдэг болон Монголтой холбоотой үйл ажиллагаа эрхэлдэг газруудад тараах арга хэмжээ авчээ. Мөн Солонгос дахь иргэдийн олон нийтийн байгууллагад мессежерээр сэрэмжлүүлэгийг хүргэж ЭСЯ-ны вэб хуудсанд байршуулсан байна.

Хөдөлмөрийн яам, Хүн амын хөгжил, нийгмийн хамгааллын яамны Сөүл дэх Нийгмийн хамгаалалын үйлчилгээний төв, Нэг цэгийн үйлчилгээний удирдлагатай уулзаж цаг үеийн байдлыг мэдээлж, ЭСЯ-наас авч хэрэгжүүлж байгаа арга хэмжээний талаар мэдэгджээ.

Г.Үжин