ОХУ руу визгүй зорчдог болоод багагүй хугацаа өнгөрлөө. Энэ хугацаанд тус улсыг зорих иргэдийн тоо хэдэн мянгаар өссөн гэхэд болно. Тэгвэл сүүлийн үед янз бүрийн шалтаг шалтгаанаар хилээр нэвтрүүлэхгүй байгаа гэх мэдээлэл цацагдсан.

 
Тухайлбал,  Хойд хилээр 2007 оны 1 сарын 1-нээс өмнө авсан паспорттай хүмүүсийг гаргахгүй байгаа гэдгийг эх сурвалжууд хэлээд байгаа. Тэд хугацаагаа хангалттай сунгуулсан байсан ч ОРОС-ын тал нэвтрүүлэхгүй байгаа гэнэ.

 
Хилийн шалган нэвтрүүлэхээс энэ асуудлыг лавлахад  "Энэ хугацаанд хүн зурагнаасаа өөрчлөгддөг" гэсэн тайлбарыг өгөөд байгаа.

Харин ГХЯ-ын Консулын газрын захирал Н.Батаагаас энэ талаар тодрууллаа.

-Хойд хилээр 2007 оны 1 сарын 1-нээс өмнө авсан паспорттай хүмүүсийг гаргахгүй байгаа гэх мэдээлэл байна. Энэ үнэн үү?
-Ташаа мэдээлэл гэдгийг албан ёсоор хэлж байна. 2014 онд ОХУ-тай иргэд харилцан зорчих хэлэлцээрийг байгуулахад 1.1-т хоёр талын иргэд 30 хоногийн хугацаанд визгүй зорчино гэж байгаа. Хэлэлцээрийн хоёрдахь заалтад “Хэрвээ ямар нэг өөрчлөлт оруулвал 30-аас доошгүй хоногийн өмнө дипломат шугамаар нөгөө талдаа мэдэгдэнэ” гэж байгаа. Тэгэхээр ОХУ-тай байгуулсан хэлэлцээрээр бол өнөөдөр та бүхний хэрэглэж байгаа иргэний паспорт хүчин төгөлдөр юм.  Хоёр удаа сунгах боломжтой, стандартыг хангасан паспорт байгаа. Хил хамгаалахын төлөөлөгчид уулзаж аман яриагаар тохиролцож долдугаар сарын 1-нээс өмнө ОХУ-ын талаас тодруулаад энэ асуудлаар хариу өгнө гэсэн байгаа. Мөн Москва дахь манай элчин сайдын яамныхан Гадаад хэргийн яамныхантай энэ асуудлын хүрээнд уулзсан. Улмаар Оросын тал хүлцэл өчсөн. Тавдугаар сарын 24-ний өдөр хил дээр манай 50-80 иргэнийг оруулаагүй гэсэн. Оруулаагүй хилийнхэндээ арга хэмжээ авна гэдгээ мэдэгдсэн. Ийм л  байдалтай байна.

-Хуучин паспорттой бол солиулах шаардлагатай биз дээ?
-2006 оноос өмнөх паспорт хүчин төгөлдөр бус. Өмнөх наадаг зурагтайгаа байгаа. Тийм паспортоор хаана ч оруулахгүй. Ер нь өндөр хөгжилтэй оронд 10-аас дээш жил хэрэглэдэггүй. 1-5 жил хоёр удаа сунгадаг. Иргэддээ зөвлөхөд 10 жилийн дотор хүн өөрчлөгдөж, зураг нь өөрчлөгддөг тиймээс паспортоо шинэчилсэн нь дээр.

Д.Ундрах /24tsag.mn/