Өнгөрсөн сард “Хөсөгтөн” хамтлаг “Авьяаслаг Азичууд” шоуны финальд шалгарч, аваргын төлөө өрсөлдөн монголчууд биднийг баярлуулж байсан. Тэгвэл Монголын соёл урлагийн салбарынхан олон улсад өндрөөр үнэлэгдэх болсныг бас нэгэн хүн баталлаа.

ДБЭТ-ын гоцлооч Э.Амартүвшин олон улсын наадамд улсынхаа нэрийг гаргаж явна. Тэрээр “BBC” агентлагаас дуурийн дуучдын дунд хоёр жил тутамд зохион байгуулдаг “Cardiff singer of the World” тэмцээнд амжилттай оролцож байна.

Дэлхийн шилдэг 20 дуурийн дуучны нэгээр тодорсон Э.Амартүвшин өчигдөр дөрөв дэх хэсгийн тоглолтын дараа шилдэг таван оролцогчид багтлаа.

“Би хурдан морины уралдаан үзэх дуртай”

1983 оноос хойш зохион байгуулагдах болсон олон улсын чансаа өндөртэй уралдаанд Монгол Улсаа төлөөлөн анх удаа оролцож буй, гавьяат жүжигчин Э.Амартүвшин ирэх баасан гаригт тэргүүн шагнал, цомын төлөө өрсөлдөх эрхтэй болсон байна.

Канад, Турк, Беларус, БНСУ-ын дуучид мөн аваргын төлөө Э.Амартүвшинтэй өрсөлдөх юм.

24 насандаа Гавьяат жүжигчин цол хүртсэн түүнийг 2011 онд П.И.Чайковскийн нэрэмжит уралдаанд хоёрдугаар байрын шагнал хүртсэнээс нь хойш монголчууд таньдаг болсон. Соёл, Урлагийн их сургуулийг төгссөн Э.Амартүвшин 2012 онд "Опералиа" дуурийн тэмцээнд тэргүүн байр, 2013 онд “Франциско Винас” олон улсын тэмцээнд хоёрдугаар байр болон, өөр хоёр төрөлд нь тусгай байр эзэлж байсан аж. Эдгээр амжилтуудаас Э.Амартүвшинд олон улсад чансаа өндөртэй дуучин гэдгийг харж болно.

Э.Амартүвшин “Би хурдан морины уралдаан үзэх дуртай” хэмээн эх орноо сурталчилжээ.

“Cardiff singer of the World” тэмцээнд энэ жил 54 орны 350 орчим уран бүтээлч оролцсоноос шилдэг 20 дуучныг Их Британид урьж, эцсийн шалгаруулалтад оролцуулж байгаа юм.

Г.Үжин