Зовох цагт нөхрийн чанар танигдана гэсэн үг байдаг. Хэн нэгнийгээ дэвжин дээшилж байхад нь бус өвдөж зовж явахад нь тусламжийн гараа сунгах шиг сайхан, буянтай үйл гэж үгүй.  

Залуучуудын анхдугаар олимпийн аварга ОУХМ "Баавгай" Б.Батцэцэг өдгөөгөөс гурван жилийн өмнө бэлтгэл хийж байгаад хөлөндөө хүнд гэмтэл авч улмаар бэртэл нь хүндэрч спортын алтан дэвжээнээ гарч чадахгүй байгаа билээ.

23-хан настай тамирчин маань цаашид их спортдоо эргэн ирэхийн төлөө, эх орныхоо нэрийг дэлхийн тавцнаа цуурайтуулахын төлөө өнөөдөр бэртэл гэмтэлтэйгээ шүд зуун тулалдаж байна.

“Би энэ спортоор хүүхэд байхаасаа л хичээллэж эхэлсэн болохоор үхэн үхтлээ л чөлөөт бөхөөр амьдарч, амьсгалах болно” хэмээн хоолой зангируулан ярих түүний энэ л ярианаас бөхөд ямар их хайртай, бөх гэх зүйлтэй амьдралаа нэгэнт салшгүй холбосон болохыг ойлгож, түүнд туслаж үнэний дуу хоолой болох хүсэл сэтгэл төрсөн юм.

Бөхөд хайртай, бөхийн спортыг хүндэлдэг ард түмэн түүнд туслахаар хэдийн өглөгийн гараа сунгаад эхэлжээ. Түүнд туслах аяныг "Баавгай" Б.Батцэцэгийн өсөж төрсөн нутаг болох Налайх дүүргийн Засаг даргын Тамгын газар, дүүргийн Залуучуудын холбоо өрнүүлээд нэлээд хугацаа өнгөрч түүний эмчилгээний зардалд нэг сая гаруй төгрөг цугларсан байна.

Энэ талаар Б.Батцэцэг ярихдаа “Надад итгэж, намайг дэмждэг хүмүүс сэтгэлийн болон эдийн засгийн тусламж үзүүлж байгаад үнэхээр их баяртай байна. Одоогоор /хандивын тоглолт хийхийн өмнө/ нэг сая 200 мянга орчим төгрөг цугларсан байгаа. Энэ бол их мөнгө. Намайг гэсэн сэтгэлтэй, бөхөд хайртай хүмүүсийн өглөг. Та бүхэндээ бүгдэнд нь баярлалаа. Би хурдан эдгээд та бүхнийхээ ачийг хариулж, эх орныхоо нэрийг мандан бадруулах болно” хэмээн өгүүлсэн.  

"Баавгай" Б.Батцэцэгт туслах хүмүүсийн цуваа үүгээр зогсоогүй юм. МУГТ Э.Ням-Очир, МУГТ Г.Мандахнаран нарын санаачилгаар “G.B.O” энтертайнментын залуус өнгөрсөн амралтын өдөр “Сэтгэлийн илч” хэмээх эмчилгээний хандивын тоглолтыг зохион байгуулж, Монголын нийтийн болон рок поп, хип хопын хамтлаг дуучид оролцож ая дууны цэнхэр хадаг өргөсөн билээ.

Харин тоглолтоос хэдэн төгрөг цугларсан, эмчилгээний зардал бүрдсэн эсэхийг зохион байгуулагчдаас тодруулахад “Одоогоор эцсийн мөнгөн дүн гараагүй байна. Бид албан байгууллагуудад билетээ өгчихөөд тооцоогоо эцэслэн хийгээгүй байгаа. Гэхдээ нэлээд их билет зарагдаагүй үлдсэн. Ямартай ч энэ тоглолтыг үзэж, эмчилгээний зардалд хандив өргөсөн ард түмэн, тоглолтод оролцсон хамтлаг дуучиддаа маш их талархаж байна” хэмээсэн.

"Баавгай" Б.Батцэцэгт туслахыг хүссэн, туслаж байгаа хүмүүс олон. Гэвч түүний Чөлөөт хэмээн овоглож байсан Чөлөөт бөхийн холбоо өнөөдрийг хүртэл сураггүй.

Ангийн анд, амьдрал хамт байсан нөхдийнхөө төлөө сайхан сэтгэлтэй хүмүүс чадах бүхнээ хийж байна.

Гэтэл цагтаа чөлөөт бөхийн холбооны шигшээ багийн тамирчин байсан "Баавгай" Б.Батцэцэгийн төлөө холбоо юу ч хийхгүй, юу ч хэлэхгүй байгаа нь мөн л хачирхалтай.

Чөлөөтийнхөн сүүлийн үед хөнжил дотроо хөлөө жийлцэж нэгнийхээ улыг шагайхаас өөр зүйл хийхгүй байна хэмээн шүүмжлэх хүмүүс олон. Үүнийг ч "Баавгай" Б.Батцэцэгт хандаж байгаа Чөлөөт бөхийн холбооны байдал нотлох мэт санагдана. 

Өвчин зовлондоо шаналж, их спортдоо эргэн ирэхийн төлөө тэмцэж буй түүний талаарх мэдээлэл тасралгүй хөвөрсөөр байгаа. Энэ л мэдээллийн эрин зуунд Чөлөөт бөхийн холбоо, холбооны удирдлагууд юу ч мэдээгүй суугаагүй нь л лавтай.

Уг нь сөхөрсөн нэгнээ татаж авах, зовсон нэгэндээ туслах Монгол жудаг тэдэнд баймаар л юмсан.

Монголын Чөлөөт бөхийн холбоо холбооныхоо ирээдүйг бичилцэх тамирчиныхаа төлөө нэгийг хийгээсэй хэмээн хүсэх хүмүүс олон байгааг ч энд дахин дуулгая.

ГССҮТ Б.Батцэцэгт пластик хадаасаар хадсан хэмээн хэлсэн ч төмөр хадаас хөлнөөс нь гарч иржээ.

Алтан гартай эмч нарын ач буяныг магтан бишрээд барамгүй. Гэтэл сайны хажуугаар саар гэгчээр эмч нарын хариуцлагагүй үйлдлээс болж хохирсон иргэд нэлээд байдгийн нэг нь "Баавгай" Б.Батцэцэг.

Тэрбээр 2012 онд хөлөндөө гэмтэл авч ГССҮТ-т очиж, дурангийн хагалгаа хийлгэсэн байна. Харин дараа нь шөрмөс залгах хагалгаанд орох болоход  “Солонгос улсаас эмч нар ирж хагалгаа хийх гэж байгаа чамд 2 сая гаруй төгрөгийн өртөгтэй хагалгааг үнэ төлбөргүй хийж өгье” гэх саналыг эмнэлгийн эмч нар тавьжээ.

Мэдээж 2 сая гаруй төгрөгийн өртөгтэй хагалгааг үнэ төлбөргүй хийлгэх гэж байгаадаа Б.Батцэцэг үнэхээр их баярлаж, хагалгаа ч амжилттай болсон байна. Тухайн үед эмч нар “Хөлийг чинь пластик хадаасаар хадсан болохоор эдгэрэлт нь хурдан ямар нэгэн айх зүйл байхгүй” хэмээжээ. 

Гэвч энэ баярт үйл явдал удаан үргэлжилсэнгүй, жил гаруйн дараа л тараа таниулж, хагалгааны үр дүн мэдэгдсэн байна. "Баавгай" Б.Батцэцэгийн хөл өдрөөс өдөрт муудаж, бэлтгэл сургуулиалтаа хийх нь бүү хэл хоёр хөл дээрээ ч явахад хүндрэлтэй болжээ.

Ингээд эмнэлэгт хандахад “Өмнөх хагалгааны төмөр хадаас ясыг чинь үрэвсүүлж, улмаар өвдөгний хүүдий урагдсан байна. Тиймээс хөлдөө байгаа төмөр хадаасаа яаралтай авахуулах шаардлагатай. Харин үүний дараа чагтан холбоосыг холбох, шүрмэс залгах хагалгааны тухай ярих боломжтой” хэмээжээ. Ингээд тус хадаас авах хагалгааг Сонгдо эмнэлэг үнэ төлбөргүй хийж өгч, түүнд цааш алхах боломжийг нээж өгсөн байна.

Бөх хүний жудаг гаргаж, "Баавгай" Б.Батцэцэг энэ талаар дэлгэхийг хүсэхгүй байсан ч учир шалтгааныг мэдсэн бид энэ эмгэнэлт зүйлийн талаар дуугүй өнгөрч чадсангүй.  

Хэн нэгэн гадаадын эмч нар гэхээр хөл алдан гүйдэг Монголчуудын хэнэггүй зан, хариуцлагагүй эмч нараас болж өнөөдөр Б.Батцэцэг нулимс дуслуулан байж ард түмнээсээ эмчилгээний зардал гуйж сууна.

Хэрэв энэ хүнд тухайн үед төмөр хадаас гэдгийг нь хэлсэн бол өнөөдөр тэрбээр ийнхүү өвчиндөө шаналж, арга баран суухгүй байсан байх.

Гэвч юуны учир, хэний төлөө залуу тамирчинг маань хуурч, эрүүл мэндээр нь тоглох болсон нь үнэхээр хачирхалтай.

Уг нь тангараг өргөсөн эмч нар өвчтөнийхөө эрүүл мэнд, амь насыг санаатай хохироогүй л байлтай. Гэхдээ л Б.Батцэцэгт төмөр хадаасыг пластик хадаас хэмээн хэлж, түүний амьдралаар “тоглосон” байна.

Харин өнөөдөр бүх зүйл илж болж, Б.Батцэцэг 20 сая төгрөгийн өртөгтэй хагалгаанд орж чадвал их спортдоо эргэн ирэх итгэл найдвар байгаа нь сайхан.

Тиймээс буух эзэнтэй, буцах хаягтай энэ эмгэнэлтэй хагалгааны золиос, туршилт болсон түүнд тухайн үед хагалгаа хийсэн, хагалгаа хийлгэх эмч нарыг урьж авч ирсэн нөхдүүд нэгийг бодож хоёрыг хийгээсэй хэмээн хүснэм.   

        Чөлөөт бөхийн спортод тавхан настайгаасаа хөл тавьсан Б.Батцэцэгийн энэ спортод гаргасан амжилт ялалт багагүй. Тэрбээр өсвөрийн болон залуучуудын УАШТ-ний дөрвөн удаагийн аварга, Залуучуудын Ази тивийн аварга шалгаруулах тэмцээнээс мөнгө, “Mongolia open”-оос мөнгө, залуучуудын ДАШТ-ээс хүрэл, Залуучуудын анхдугаар олимпийн аварга зэрэг томоохон амжилт гаргаж тив дэлхийд Монгол Улсынхаа нэрийг өндөрт өргөж явсаныг түүх гэрчилнэ.

Б.Батчимэг

www.24tsag.mn