“Наадмын маргааш намар эхэлнэ. Хүн бүр ажил алба, амралт зугаалгаа зохицуулж, ирэх өвлийн сорилтыг давахад онцгой анхаарахыг сануулж байна. Өвлийн жавар, хаврын хавсаргыг зуны бэлтгэл, намрын хөдөлмөрөөр гэтлэх болно” хэмээн Монгол Улсын Ерөнхийлөгч Үндэсний их баяр наадмыг хааж хэлсэн үгэндээ онцолсон.

Энэ нь ч мэдээж учиртай. Алдарт мичин жил асуй өнөө үед өвлийн бэлтгэлээ базаах ажлыг эрчимжүүлэхийг Засгийн газар анхааруулж, Ерөнхий сайд Ч.Сайханбилэг наймдугаар сарын 1-ээс хойш ямар ч наадам, тэмдэглэлт ойг хийхгүй байхаар шийдвэрлэсэн.

Тиймээс ч аймаг сумдууд тэмдэглэлт ой, баяр наадмаа долдугаар сардаа багтаан тэмдэглэж буй. Гэтэл олны дотроос онцгойрч, Ерөнхий сайдын шийдвэрийг уландаа гишгэж, “том толгойлж” байгаа аймаг сумдууд бас байх юм.

Тодруулбал Говьсүмбэр аймгийнхан баяр наадмаа Зүүн бүсийн Боржигон наадамтайгаа хамтруулан ирэх наймдугаар сарын 8-9-ний өдрүүдэд зохион байгуулахаар болсон.

Мөн Ховд аймгийн Буянт, Чандмань сумд энэ жил 90 жилийн ойгоо тэмдэглэнэ. Буянт сум 90 жилийн ойгоо есдүгээр сарын 4-6-ны өдрүүдэд тэмдэглэхээр шийдвэрлэсэн байх юм.

Энэхүү таагүй мэдээ Засгийн газрын эрхмүүдийн чихэнд хүрч Говьсүмбэр болоод Буянт сумдад шаардлага хүргүүлж, баяр наадмын үйл ажиллагаагаа урагшлуулах, товлосон хугацаанд амжиж наадамлахыг үүрэгджээ. Гэвч өнөөдрийг хүртэл дээрх “том толгойтой” нөхдүүд баяр наадмаа товлосон хугацаандаа хийх эсэх нь тодорхойгүй байгаа юм.

Зуны дэлгэр, намрын налгар өдрүүдэд найрлаж, зугаацсан Монголчууд өвлийн хатуу өдрүүдийг туулах гэж “үгээ хэлдэг” нь нууц биш.

Тиймээс өвлийн хахир хатууг өнөтэй давах ганцхан арга нь намрын бэлтгэл ажлаас ихээхэн хамаардаг гэдгийг анхаарч бэлтгэл ажлаа базаах шаардлагатай гэдгийг учир мэдэх хүмүүс хэлж байгааг ч энд өгүүлэх нь зүйтэй болов уу.  

Түүнчлэн энэ жил зуншлага тааруу, ихэнх аймгууд гантай байгааг албаны хүмүүс онцолж байгаа бол алдарт мичин жил айсуй гэдгийг ч хашир малчид өгүүлж байгаа юм. Тиймээс ниргэсэн хойно нь хашгирав гэгчийн үлгэр болохгүйн тулд наадмын дараа намар гэдэг мэргэн үгийг санацгааж, өвлийн бэлтгэл ажилдаа  ханцуй шамлан орох шаардлагатай юм.

Харин Ерөнхий сайдын шийдвэрийг үл тоомсорлож, найм есдүгээр сард наадамлах гэж байгаа аймаг сумдын баяр наадмыг урагшлуулах ажлыг албаны хүмүүс эрчимжүүлэх буй за.

 24tsag.mn Б.Батчимэг