БНСУ дахь Монголын Элчин сайдын жолооч ноцтой зөрчил гаргасан тухай Солонгосын хэвлэлүүд онцолжээ. Тодруулбал, Сөүл дэх Монголын ЭСЯ-нд харьяалагддаг машиныг жолоо барих эрхгүй хүн жолоодож байсан байна. Жунгбу дүүргийн цагдаагийн газрын мэдээлснээр 45 настай монгол эрэгтэй өнгөрсөн даваа гарагт саатуулагджээ. Тэрээр Сөүлийн төв хэсэгт дипломатын машиныг барьж явахдаа замын цагдаагийн анхаарлыг татсан байна.
Жолооч эрэгтэйг цонхоороо татсан тамхиныхаа ишийг хаясныг харсан цагдаа түүнийг торгохоор зогсоожээ. Цагдаа монгол залуугаас биеийн байцаалтыг нь асуухад дипломатын бус энгийн пасспорт үзүүлсэн гэв. Харин жолооны үнэмлэхээ үзүүлэхийг хүсэхэд “Надад жолооны үнэмлэх байхгүй” хэмээн хариулжээ.
Цагдаагийн газрын мэдээлснээр Монголын дипломатын жолооч өмнө нь 2004 онд БНСУ-д их хэмжээний согтууруулах ундаа хэрэглэсэн үедээ жолоо барьж байсныг илрүүлсэн байна. Тиймээс нэрийг нь нууцалсан эрэгтэйн жолооны үнэмлэхийг хүчингүй болгосон байжээ.
Жолооч эрэгтэй цагдаад өөрийгөө Монголын үндэсний агаарын тээврийн компани МИАТ-д удирдах албан тушаал хашдаг байсан хэмээн ярьсан байна. Мөн цагдаагийн газраас “Тэрээр БНСУ-ын хууль ёсны иргэн байсан бөгөөд дипломатын машиныг Монголын ЭСЯ-аас өгсөн үүргийн дагуу барьж байсан гэж мэдэгдсэн” хэмээн мэдээлжээ.
БНСУ дахь Монголын ЭСЯ энэ мэдээлэлд хариу өгөхөөс татгалзсаныг Солонгосын хэвлэлүүд онцолсон байна.
Д.Идэр
Сэтгэгдэл (8)