Өнгөрсөн долоо хоногт МАН-ыг засгаас хөөснөөр АН Монголын түүхэнд хэзээ ч байгаагүй тогтворгүй, сунжирсан, хариуцлагагүй УИХ гэдгээ олон нийтэд баталлаа. Энэ янзаар бол дараагийн УИХ бүрэлдэх жил хүрэхгүй хугацаанд дахин хоёр удаа засгийн бүрэлдэхүүнд халгаа сэлгээ хийх шинж харагдаж байна. МАН-ын сайдуудыг огцруулснаар АН дотор тэдний оронд суух давхар дээлтүүд хэн байх вэ гэсэн асуудал халуун сэдэв болж байна. Саарал ордны эх сурвалжийн мэдээлснээр АН бие даагчид болон ИЗНН суудал хуваарьлахгүй бөгөөд 6 суудлын тавыг нь дотроосоо, нэгийг нь Шударга ёс эвсэлд өгнө гэсэн мэдээлэл бий. Түүнчлэн зургаан сайдад хэн суух таамаг, хэлэлцээ яригдаж байгааг хэвлэлүүд өөрийн эх сурвалжуудаараа дамжуулан мэдээлж байна.

Энэ зуур АН сайдын суудлын төлөөх тэмцэлд дотроо хэд хэдэн фракц, хэд хэдэн хэсэг болон хуваагдаж байна.  Үүнийг батлах нэг баримт бол дараах албан бичиг юм. Уг баримтад УИХ-ын гишүүн Б.Наранхүүг Зам тээврийн сайдад томилох хүсэлтийг АН-ын УИХ дахь зарим гишүүд гаргажээ. Тодруулбал, Ж.Батзандан, Б.Болор, Л.Гантөмөр, М.Батчимэг, Г.Баярсайхан, Х.Тэмүүжин нар өргөдөл гаргаж Б.Наранхүүг сайдад томилохыг хүссэн байна.

Үүнд “Засгийн газрын 6 сайдыг нөхөн томилохтой холбогдуулан АН-ын бүлгийн залуу гишүүд бид АН-д ногдох засгийн газрын томилгооны квотын хүрээнд шинээр сонгогдсон залуу үеэ дэмжиж, УИХ-ын гишүү Б.Наранхүүг Засгийн газрын гишүүн, Зам тээврийн сайдад нэр дэвшүүлж, томилуулах хүсэлтэй байгаагаа илэрхийлж байна” гэжээ.

Нэгэн бүлэг болсон дээрх гишүүдийн хүсэлтэд АН-ын томчууд хэрхэн хариу өгөх нь сайдын томилгооноос харагдана.

АН сайдуудаа ер нь ийм зарчмаар томилох нь. Тус намын залуу гишүүдээс гадна эмэгтэйчүүд, хөгшчүүл, фракциуд бүр нэг нэг төлөөлөгч нэр дэвшүүлэх нь. Ямар ч байсан АН-ын доторх олон бүлэглэл Засгийн газрын сайдуудаа энэ зарчмаар сонгох үлдлээ.

Улс орны хувь заяаг нэг жил тодорхойлох сайдууд томилогдмогц 6 яамны албан хаагчдыг дахин халж, өөрсдийн хүмүүсээ томилно. Төрийн тогтвортой байдал, төрийн бодлогыг хэрэгжүүлэх яамны үйл ажиллагаа АН-д хамаагүй болсны тод илрэл нь халгаа сэлгээний их давалгаа боллоо.

Д.Идэр

www.24tsag.mn