Улсын хилээр нэвтрүүлэхийг хориглосон хуш модны самрыг хоёр удаагийн үйлдлээр хилээр нэвтрүүлсэн Х.Амартүвшин, О.Эрдэнэ нарт холбогдох хэргийг Дүүргийн эрүүгийн хэргийн анхан шатны хоёрдугаар шүүхэд энэ сарын 11-12-ны өдөр хэлэлцэн шийдвэрлэжээ. Тэд 2011 оны 12 дугаар сарын 3-наас 2012 оны нэгдүгээр сарын 5-ны хооронд 27 вагон самрыг хоёр удаагийн үйлдлээр Замын-Үүдийн боомтоор Монгол Улсын хилээр нэвтрүүлж онц их хэмжээний хохирол учруулсан гэдгийг мөрдөн байцаалтын явцад тогтоогсон байна.

Дээрх хэргийг үйлдсэн Х.Амартүвшинд зургаан жил зургаан сарын хугацаагаар  хорих ялыг чанга дэглэмтэй эрэгтэйчүүдийн хорих ангид  эдлүүлэхээр,  мөн шүүгдэгч О.Эрдэнэд зургаан жил зургаан сар хорих ял эдлүүлэхээр шийтгэсэн байна.

Мөн энэ хэрэгт оролцсон Гаалийн улсын байцаагч  Б.Лхагвадорж, Б.Уранчимэг, Д.Отгонбилэг нарт Эрүүгийн хуулийн тусгай ангийн 272 дугаар зүйлийн 272.2 дахь хэсэгт зааснаар  тодорхой албан тушаал эрхлэх, үйл ажиллагаа явуулах эрхийг хоёр жилийн хугацаагаар хасч,  хоёр жилийн хугацаагаар хорих ял эдлүүлэхээр, Улаанбаатар Төмөр замын удирдах газрын ажилтан  Б.Эрдэнэхүү, П.Бат-Эрдэнэ нарыг мөн албан тушаалаас нь буулгаж хоёр жилийн хугацаагаар хорих ял эдлүүлэхээр тус тус шийтгэж, тэдгээрийн хувийн байдлыг харгалзан Б.Лхагвадоржид оноосон ялыг хоёр жилийн хугацаагаар, Б.Уранчимэг, Д.Отгонбилэг, Б.Эрдэнэхүү, П.Бат-Эрдэнэ нарт оноосон ялыг нэг жилийн хугацаагаар тус тус  тэнсэж хянан харгалзах ялаар шийтгэжээ.