Ерөнхий сайд асан Н.Алтанхуягийн ахлах зөвлөх Л.Гансүхийн шүүх хурал өглөө 09:00 цагаас эхлэх байсан ч 09:35 минутад эхэлж, арав хүрэхгүй минутын дараа завсарлагын байдалд шилжив.

Ахлах зөвлөхийнхөө шүүх хуралд гэрчээр оролцоно гэдгээ мэдэгдсэн Н.Алтанхуягийн гишүүний хувьд 09:20 цагт шүүх хурлын танхимд орж ирлээ.

Харин шүүгчид шүүх танхимд 09:30 цагт орж ирснээр шүүх хурал эхэлж, ирцийн мэдээллийг авсан юм. Улмаар ирцийн асуудлаар шүүгчид шүүгдэгч нарын өмгөөлөгчдөөс санал авахад чухал гэрч, шинжээч нар ирээгүйн учир шүүх хурлыг хойшлуулах саналтай байгаагаа хэлсэн юм.

Мөн шүүгчдэгч нараас ирцийн асуудлаар санал авахад Л.Гансүх "Гэрч Н.Ичинхорлоог шүүх хуралд албадан ирүүлэх хэрэгтэй байна. Ичинхорлоогийн хувьд Аудитын хуулийн маш олон заалтыг зөрчсөн. Нотлох баримтыг хуурамчаар бүрдүүлж, зохиомол дүгнэлтийг гаргасан. Мөн Отгонбаяр гэгчийг оролцуулмаар байна. Тэрбээр зөрчилтэй  мэдээлэл өгч, Л.Гансүх намайг дарамталсан гэх худал зүйл хүртэл ярьсан" гэлээ.

Ийн шүүх хурал арав хүрэхгүй минутын дараа завсарлагын байдалд шилжлээ.

Улмаар шүүгчдийн бүрэлдэхүүн уг хүсэлтийг хүлээн авч  шүүх хурлыг 9 сарын 10-ны өдөр 10 цагаас эхлүүлэхээр товлолоо.

Ингэхдээ хойшлуулах хүсэлтийг хүлээн авч байгаа ч шүүгдэгчдэд таслан сэргийлэх арга хэмжээ авч байна. Тиймээс дараагийн шүүх хурал Цагдан хорих 461 дүгээр ангид болно гэдгийг шүүгч нарын зүгээс онцоллоо.

Шүүх хурал хойшлогдсоныг зарласны дараа Л.Гансүх болон энэ хэрэгт холбогдон буруутгагдаж буй хүмүүсийг хорихоор авч явлаа. Шүүх хурал болтол тэднийг суллахгүй байхаар шийдсэн юм.

Ерөнхий сайд асан Н.Алтанхуяг хэд хоногийн өмнө зөвлөхийнхөө шүүх хуралд гэрчээр оролцохоо мэдэгдсэн. Тэрээр хэлсэн амандаа хүрч өнөөдөр шүүх танхимд гэрчээр ирсэн ч уг хэрэгт ач холбогдолтой гэх бусад гэрчүүд ирээгүй юм. Нийгмийн сүлжээгээр засгийн газрын экс тэргүүнийг өөрийн хүнээ хамгаалдаг, амласандаа хүрдэг хүн байна гэх яриа өрнөж байна.

Л.Гансүхийн өмгөөлөгчид бүхнийг олон нийтэд ил явуулах хүсэлтэй байгаа тул ирэх пүрэв гарагт болох шүүх хурал ч нээлттэй болно гэж үзэж байна.

Д.Ундрах/24tsag.mn/