Ерөнхий сайд асан Н.Алтанхуягийн ахлах зөвлөхөөр ажиллаж байсан Л.Гансүхийг “Нүүрс” хөтөлбөрийн хүрээнд хувьдаа мөнгө завшсан хэрэгт буруутган, цагдан хориод байгаа билээ.

Тус хэрэгт холбогдох шүүх хурал гурван удаа хойшилж шүүгч нар дөрөвдэх шүүх хурлыг цагдан хорих 461-р ангид хийх шийдвэр гаргасан. Үүнийг шүүгдэгч Л.Гансүх эсэргүүцэж, шүүх танхимд, нээлттэй шүүхгүй бол өлсгөлөн зарлана гэдгээ мэдэгдсэн юм.

Мөн эгэл жирийн иргэд ч Л.Гансүх нарын шүүх хурлыг шүүх танхимд нээлттэй явуулж өгөх хүсэлт гарган, жагссанаар шүүх хурлыг Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхийн танхимд болгох шийдвэрийг шүүх бүрэлдэхүүн гаргасан юм.

Ийнхүү өчигдөр шүүх хурал 10 цаг 30 минутанд эхэлсэн.

Шүүх хурал эхлэхээс өмнө хурлын талаарх мэдээллийг бэлгэхээр ирсэн хэвлэл мэдээллийн ажилчдыг шүүх танхимд багтахгүй гэх шалтгаанаар танхимаас гаргасан нь нэлээд маргаан дагуулав. Учир нь тус шүүх хурал нээлттэй явагдана хэмээж байсан ч танхимаас гаргасан нь сэтгүүлч нарын бухимдлыг төрүүлэх шалтгаан болсон юм. Эцэст нь шүүх бүрэлдэхүүнд хүсэлт гаргасан TV9, Eagle телевизүүдэд шүүх хурлыг шууд дамжуулах эрх олгов.

Шүүгдэгч талын өмгөөлөгч шүүх хурал давхардсан гэх шалтгаанаар шүүх хуралдаанд ирээгүй бөгөөд шүүх хурлыг хойшлуулж өгөх хүсэлтийг тавьсан. Мөн гэрчээр оролцох Багануурын нүүрсний уурхайн ТУЗ-ын гишүүн н.Жигжид шүүх хуралд ирээгүй  юм. Улмаар шүүх бүрэлдэхүүн хуралдааныг хойшлуулах эсэхийг хэлэлцсэний эцэст Л.Гансүх нарт холбогдох анхан шатны шүүх хуралдааныг үргэлжлүүлэхээр боллоо.

Хурал эхлэхэд Л.Гансүх нарын шүүгдэгчдийн өмгөөлөгчийн зүгээс шүүх бүрэлдэхүүнээс татгалзаж байгаагаа илэрхийлэв.

Тэд шүүх бүрэлдэхүүнээс татгазлаж буй шалгаанаа ийнхүү тайлбарласан юм. “Үндсэн хуулийн 16-р зүйл заасан хүний эрх, эрх чөлөөний тухай заасан хэсэгт Монгол Улсын иргэн аливаа хэргийг шударга шүүхээр шийдвэрлүүлэх эрхтэй гэж заасан. Шударга шүүхэд эргэлзээ төрүүлэх бодитой нөхцөлүүд Баянзүрх, Сүхбаатар, Чингэлтэй дүүргийн эрүүгийн хэргийн нэгдүгээр шүүх дээр бий болсон.

Тодруулбал:

Нэгдүгээрт, Л.Гансүхийг тус дүүргийн шүүхээс цагдан хорьж хууль зөрчсөн.

Хоёрдугаарт, Шүүх хуралдаан гурван удаа хойшлоход шүүх бүрэлдэхүүн хэд хэдэн удаа өөрчлөгдсөн. Шүүхийн тухай хуульд зааснаар шүүх бүрэлдэхүүнийг шүүгчдийн зөвлөлөөр шийддэг.

Гуравдугаарт, Шүүгч Х.Идэрийн ах Х.Тамир хар тамхины хэргээр АТГ-т шалгагдаж байгаа энэ үед Х.Идэр шүүгч энэ ашиг сонирхлын зөрчилтэй хэргийг шүүхээс өөрийн саналаар татгалзах ёстой.

Иймээс Шүүх бүрэлдэхүүн энэ хэрэгт гадны нөлөөтэйгээр оролцож байгаа. Х.Идэр шүүгчээр хэргийг шийдүүлмээргүй байна. Учир нь Х.Идэр шүүгчийн ах Х.Тамир прокурор хар тамхины хэргээр шалгагдаж байгаа. Гэтэл шалгаж байгаа ажлын хэсгийг АТГ ахалж байна. Ингээд бодохоор цаанаасаа захиалгатай нь харагдаж байгаа биз дээ. Х.Идэр шүүгчийн ахыг Л.Гансүхийн хэрэг шийдэгдэхээс өмнө Ганц худагт хорьж, дүүд нь энэ хэргийг хуваарилж байна. Бид дуугүй л байсан. Гэтэл асуудал ийм байдалд хүрчихлээ.

Өөрөөр хэлбэл, Х.Идэр шүүгч Л.Гансүхийг яллавал ах Х.Тамир нь ялгүй гарна. Яллаж чадахгүй бол ах нь шоронд орно гэх барьцаа байхыг үгүйсгэхгүй. Тиймээс Баянзүрх, Сүхбаатар, Чингэлтэй дүүргийн эрүүгийн шүүхэд хэргийг шийдвэрлэхийг өмгөөлөгчийн хувьд хүлээн зөвшөөрөхгүй. Ер нь бид энэ шүүх бүрэлдэхүүнээс  татгалзаж байна” гэсэн юм. Тиймээс шүүх бүрэлдэхүүн өмгөөлөгч нарыг хүсэлтээ бичгээр гаргаж өгөхийг хүсэв.

Ингээд уг хүсэлтийг шүүх хүлээн авах эсэхээ хэлэлцэхээр шүүх хуралдаан 12 цаг 30 минутын орчимд дахин завсарлав.

Завсарлага авсан шүүх хурлыг үргэлжлэхийг хүлээсэн шүүгдэгч, нэхэмжлэгч, гэрч, өмгөөлөгч гээд шүүх хуралдаанд оролцсон хүмүүсийн хүлээлт хэрээс хэтэрч, тэвчээр нь барагдаж байсныг энд нуух юун. Түүнчлэн шүүх хурлыг дамжуулах эрх авсан ч цаг минуттай уралдан байж ажилладаг телевизүүд ч шүүх хурлыг эхлэхийг хүлээж чадаагүй юм. Ийнхүү бүхэл бүтэн таван цаг хүлээлт үүсгэсний эцэст шүүгч нар шүүх танхимд орж ирэв.

Таван цагийн дараа үргэлжилсэн шүүх хуралдаан эхлэхэд шүүх хуралдааныг даргалагч Х.Идэр “Шүүгдэгч н.Даваахүү, н.Мөнгөнтуяа нарын өмгөөлөгч Ч.Шаравнямбуу шүүхээс татгалзсан хүсэлтээ албан бичгээр хүргүүлсэн” гэдгийг тэмдэглээд тэдний шүүх бүрэлдэхүүнээс татгалзсан албан бичигт өгсөн Ерөнхий шүүгчийн захирамжийг өмгөөлөгч нар танилцуулав. Түүнчлэн шүүгдэгч Л.Гансүхийн өмгөөлөгч Ц.Баасандорж, Л.Цэндсүрэн нар татгалзах хүсэлтээ албан бичгээр өгөөгүй, шүүх хуралдаанд ирээгүй нь шүүхийг үл хүндэтгэж байна гэж үзсэн юм.

Улсын яллагч энэ тохиолдолд Шүүгдэгчийн өмгөөлөгч ирээгүй тул шүүх хурлыг хойшлуулах, шүүхийг үл хүндэтгэсэн өмгөөлөгч нарт хариуцлага тооцох хуулийн заалттайг танилцуулав.

Харин өмгөөлөгч н.Шаравнямбуу “Бид шүүх бүрэлдэхүүнээс татгалзаад байхад яагаад Ерөнхий шүүгч захирамж гаргаж байгаа юм. Хуульд шүүх бүрэлдэхүүнээс татгалзсан тохиолдолд яах ёстойг тодорхой тусгаагүй ч амьдралд ийм тохиолдол гарч, давж заалдах шатны шүүхээр хэлэлцэж байсан удаа олон байгаа юм. Уг нь Ерөнхий шүүгч миний хүсэлтийг өөрийн биеэр сонгож надтай уулзана гэж хүлээлгэж байтал шүүх хурал эхэлчихлээ. Энэ ямар учиртай юм бэ” хэмээв.

Ингээд шүүх бүрэлдэхүүн дахин завсарлага авав.  

Шүүх бүрэлдэхүүн Л.Гансүх нарт  холбогдох шүүх хурлыг "Ирц бүрдээгүй" гэх шалтгаанаар энэ сарын 15-ны өдрийн 10.00 цаг хүртэл дахин хойшлуулах тогтоол гаргав.

Түүнчлэн Л.Гансүх нарыг цагдан хорих шийдвэрийг хэвээр үлдээсэн бөгөөд хуралдаанд ирээгүй Л.Гансүхийн хоёр өмгөөлөгчийг хөдөлмөрийн хөлсний доод хэмжээг 4 дахин нэмэгдүүлсэнтэй тэнцэх хэмжээний 768 мянган төгрөгөөр торгох шийдвэр гаргаснаар хуралдаан өндөрлөлөө.

24tsag.mn