Зах зээл үүсгэгч, шорт арилжаа, шинэ бүтээгдэхүүн, өгөгдөл-тайлагналын шинэчлэлийг үе шаттай хэрэгжүүлнэ. 

“Монголын хөрөнгийн бирж” ХК 2026 оны 4 дүгээр сарын 10-ны өдөр хөрөнгийн зах зээлийн оролцогч талуудыг хамруулсан өргөн хүрээний уулзалт, хэлэлцүүлэг зохион байгуулж, энэ үеэр “Хөрөнгийн зах зээлийн хөрвөх чадварыг нэмэгдүүлэх тусгай хөтөлбөр”-өө албан ёсоор танилцууллаа.

Хөрөнгийн зах зээлийн хөрвөх чадвар буюу liquidity нь үнэт цаасыг хурдан, бага зардлаар, үнийг огцом хөдөлгөхгүйгээр арилжаалах боломжийг илэрхийлдэг бөгөөд зах зээлийн идэвх, эрэлт нийлүүлэлт, үнэ тогтоолтын чанартай шууд холбоотой үзүүлэлт юм.

Хөрвөх чадвар сайтай зах зээл нь хөрөнгө оруулагчдад илүү ойлгомжтой, илүү найдвартай орчин бүрдүүлдэг.

Монголын хөрөнгийн зах зээлийн хөрвөх чадварыг нэмэгдүүлэхийн тулд үнийн зөв тогтцыг бүрдүүлэх, гүйлгээний зардлыг бууруулах, зах зээлийн тогтвортой байдлыг нэмэгдүүлэх, хөрөнгө оруулалтын орчныг сайжруулах, эдийн засгийн өсөлтөд эерэг нөлөө үзүүлэх зэрэг үндсэн шаардлагууд бий болж байгааг МХБ тодотгосон.

“Монголын хөрөнгийн бирж” ХК-ийн Гүйцэтгэх захирлын үүргийг түр орлон гүйцэтгэгч Д.Мөнхбат “Тус хөтөлбөр нь зөвхөн биржийн дотоод шинэчлэл биш бөгөөд зах зээлийн оролцогч талуудын хамтын ажиллагаанд тулгуурласан, үр дүн нь олон нийт, хөрөнгө оруулагч, компани, мэргэжлийн оролцогч бүрт хүрэх ёстой цогц бодлогын ажил” болохыг онцоллоо.

Мөн биржийн Бизнес хөгжлийн газрын захирал Т.Хаш-Эрдэнэ тус хөтөлбөрийн хүрээнд зах зээл үүсгэгчийн тогтолцоог сайжруулах, шорт арилжаа, үнэт цаас зээлэх-зээлдүүлэх орчныг бүрдүүлэх, арилжааны өртгийг бууруулах бодлого хэрэгжүүлэх, шинэ бүтээгдэхүүн, шинэ индекс, шинэ үйлчилгээ нэвтрүүлэх, өгөгдөл, тайлагнал, ил тод байдлыг системийн түвшинд сайжруулах ажлууд үе шаттай хэрэгжихийг танилцуулсан юм.

Түүнчлэн Сангийн дэд сайд Б.Хулан Монгол Улсын макро эдийн засгийн өнөөгийн нөхцөл байдал болон санхүүгийн секторыг дэмжих бодлого, одоо хүчин төгөлдөр мөрдөгдөж буй татварын орчны хөнгөлөлтийн талаар мэдээлэл өглөө.

Арга хэмжээний онцлох хэсгийн нэг нь тун удахгүй Монголын хөрөнгийн зах зээлд алтны ETF буюу шинэ бүтээгдэхүүн нэвтрүүлэхтэй холбоотой мэдээлэл байв. “Би Би Эс Эй” ХХК-ийн Гүйцэтгэх захирал Ж.Батаа “Гоулд Траст” хамтын биржээр арилжаалагддаг хөрөнгө оруулалтын сангийн бүтээгдэхүүний талаар танилцуулж, уг бүтээгдэхүүн нь 100 хувь алтанд хөрөнгө оруулалт хийх зорилготой бөгөөд олон нийтэд алтанд бага дүнгээр хөрөнгө оруулах илүү хялбар боломж бүрдүүлэхийг онцолсон юм.

Ингэснээр “Хөрөнгийн зах зээлийн хөрвөх чадварыг нэмэгдүүлэх тусгай хөтөлбөр” нь зөвхөн биржийн үйл ажиллагааны шинэчлэл бус, зах зээлийн бүтцийн чанарыг сайжруулах, хөрөнгө оруулагчийн оролцоог тэлэх, шинэ бүтээгдэхүүн нэвтрүүлэх, мэдээллийн ил тод байдлыг нэмэгдүүлэх цогц бодлогын ажил болж эхэлж байна.

Тус арга хэмжээнд “Монголын хөрөнгийн бирж” ХК-ийн газрын захирлууд, Санхүүгийн зохицуулах хороо, “Үнэт цаасны төвлөрсөн хадгаламжийн төв” ХХК-ийн холбогдох албан тушаалтнууд, брокер дилерийн компаниуд, хөрөнгө оруулалтын менежментийн компаниудын удирдлага, мэргэжилтнүүд өргөнөөр оролцов.

МОНГОЛЫН ХӨРӨНГИЙН БИРЖ