БАРИМТ 1
Доржсүрэнгийн Сумъяа нь 1991 оны гуравдугаар сарын 11-ний даваа гарагт Увс аймгийн Баруунтуруун суманд мэндэлжээ.
БАРИМТ 2
Жүдо барилдааны 57 кг жинд олимпын мөнгө, Дэлхийн АШТ-ий алт, хошой хүрэл медаль, Азийн наадмын хошой хүрэл, Азийн АШТ-ий алт, хошой хүрэл медаль хүртсэн
БАРИМТ 3
Тэрбээр жүдо бөхийн түүхэн дэх Монголын дөрөв дэх дэлхийн аварга юм. Мөн самбо бөхийн дэлхийн 3 удаагийн аварга.
БАРИМТ 4
Монгол Улсын Ерөнхийлөгч Х.Баттулга зарлиг гаргаж Үндэсний шигшээ багийн тамирчин Доржсүрэнгийн Сумъяад Монгол Улсын Хөдөлмөрийн баатар цол хүртээж /2017.11.01/ шагналыг гардуулан өгөв.
БАРИМТ 5
Түүнийг төрсөн гаргийнх нь нэрээр Сумъяа хэмээн нэрлэсэн байна. Утгыг нь хөөвөл Саран лугаа гэсэн үг аж.
БАРИМТ 6
2017 оны Унгарын Будапешт хотноо болсон жүдо бөхийн насанд хүрэгчдийн ДАШТ-ий эмэгтэйчүүдийн 57 кг-д Д.Сумъяа учраа болгоноо илүүрхэн ялж, улмаар дэлхийн аваргын алтан медалийн төлөө Японы жүдоч Цүкаса Ёшидатай хүч үзэж, нэмэлт цагт вазари үнэлгээгээр буулган авч дэлхийн аварга болж байв.
БАРИМТ 7
Д.Сумъяа 2016 оны Риогийн олимпын наадмын жүдо бөхийн эмэгтэйчүүдийн 57 кг-ын жинд мөнгөн медалийн эзэн болж, Монголын олимпын 25 дахь медальтан тамирчин болж байв.
БАРИМТ 8
Д.Сумъяа таван дүүтэй бөгөөд тэдний дөрөв нь эрэгтэй. Дүү нартайгаа тоглож, ноцолдож өссөн учраас түүнд бөх болох хүсэл бүр эртнээс төрсөн гэдэг.
БАРИМТ 9
Түүний аав залуудаа чөлөөт бөхөөр шаггүй барилддаг нэгэн байжээ. Бөхөд хайртай аав нь түүнийг дагуулж, “Монгол охид” клубт оруулж анх жүдо бөхийн ертөнцөд хөл тавиулж байв.
БАРИМТ 10
Д.Сумъяад самбо, жүдогийн “А” үсгийг н.Базарсүрэн, С.Эрдэнэбат багш нар зааж өгч байсан байна.
БАРИМТ 11
Олон улс, тив, дэлхийн дэвжээнд эмэгтэйчүүдийн 57 кг-д эх орныхоо нэрийг мандуулж явсан Х.Эрдэнэт-Одыг зодог тайлсны дараа түүний халааг Д.Сумъяаг залгамжилна хэмээн олон хүн итгэж байсан. Тиймээс ч Х.Эрдэнэт-Од багш түүнийг сүүлийн жилүүдэд нь тасралтгүй дасгалжуулсан.
БАРИМТ 12
Д.Сумъяа 2009 онд “Чингис хаан” дэлхийн цомоос мөнгөн медаль зүүж, ОУ-ын тэмцээний анхны амжилтаа гаргаж байв.
БАРИМТ 13
Жиндээ биеэр жижигдэггүй Д.Сумъяа бяраар хэнээс ч дутахгүй гэдгийг багш нар нь хэлдэг. Манай бөхчүүд хэвтээ барилдаанд тааруу хэмээн шүүмжлүүлэх нь олон. Тэгвэл Д.Сумъяа хэвтээгээс тун сайн барилддаг. 2012 оны УАШТ-д түрүүлэхдээ бүх өрсөлдөгчөө дарах мэхээр цэвэр ялсан нь үүнийг нотлоно.
БАРИМТ 14
Д.Сумъяа 2013 онд Мастерс тэмцээнд зодоглож, Оросын И.Заблудина, Бразилийн Р.Сильва, Японы А.Ямамото, Францын А.Павиа гэсэн бөхчүүдийг дараалан нурааж, Мастерсын аварга жүдочдын тоог нэгээр нэмж байв.
БАРИМТ 15
Д.Сумъяа 2015 онд жиндээ “дархан” гэдгээ дахин баталсан бөгөөд олимпын жилийн улсын аваргад мөн л түүнийг барах жүдоч гараагүй.
БАРИМТ 16
Самбо бөхийн 2012-2014 оны ДАШТ-д хэнд ч ялагдаагүй босоо аварга бол Д.Сумъяа. Тэрбээр 2012 онд дэлхийн аваргад анх удаа түрүүлэхдээ шилдэг хүчтэнүүдийг сөхрүүлсээр финалд Болгарийн Калина Стефановаг өвдөг шороодуулан алтан медаль хүртсэн юм. арин дараа жил нь мөн л Болгар бүсгүйг хожиж дэлхийн хошой аварга болжээ. 2014 онд Японы Нарита хотод болсон самбо бөхийн ДАШТ-д манайхан өргөн бүрэлдэхүүнтэй оролцож, гурван алтан медальтай ирсний нэг нь Сумъяагийнх байлаа. Тэрбээр аваргын төлөө Татьяна Зенченког орхиж, дэлхийн аваргад гурав дахь удаагаа түрүүлсэн юм.
БАРИМТ 17
Чансаагаараа жин тус бүрт эхний 16-д шалгарсан шилдэг жүдочид урилгаар оролцдогоороо онцлог “Мастерс” тэмцээнд Д.Сумъяа хоёр удаа түрүүлсэн нь түүнийг ямар хэмжээний бөх гэдгийг бэлхэн тодорхойлно.
БАРИМТ 18
Д.Сумъяа өөрийн гэсэн кимоногүй хоёр жилийн турш хүний кимоно гуйж өмсөн тэмцээнд ордог байжээ. 2009 онд Хятад кимоно 80 мянган төгрөгөөр худалдан авч хөл газар хүрэхгүй баярлаж байсан гэдэг.
БАРИМТ 19
Дэлхийн оюутны спортын наадам Универсиадаас алтан медаль хүртсэн амжилтыг нь төр засаг үнэлж 30 сая төгрөгөөр шагнаж байсан.
БАРИМТ 20
"Infostrada" цахим хуудас "Рио-2016" Олимпын чансааг гаргахдаа Д.Сумъяаг жиндээ алтан медаль хүртэнэ гэж байв.
БАРИМТ 21
Түүний нөхөр нь Булган аймгийн Хутаг-Өндөр сумын харьяат Улсын начин Х.Цогтгэрэл юм.
БАРИМТ 22
Тэрбээр Гранпри тэмцээний таван алт, дөрвөн мөнгө, нэг хүрэлтэй.
БАРИМТ 23
Харин Их дуулга тэмцээний нэг алт, гурван мөнгө, долоон хүрэлтэй.
БАРИМТ 24
Д.Сумъяа нөхрөөсөө нэг насаар эгч. Хосууд жүдогоор барилда яваад танилцсан гэдэг.
