Өнөөдрийн Засгийн газрын хуралдаанаар "Эрдэнэс Монгол" ХХК-ийн харьяа 10 ТӨК-ийг татан буулгалаа. Тус шийдвэрийн талаар "Эрдэнэс Монгол" ХХК-ийн гүйцэтгэх захирал Б.Даваадалай мэдээлэл өглөө. 

Тэрбээр: “Эрдэнэс Монгол” нэгдлийн хүрээнд томоохон шинэчлэлийг эхлүүлж байна. Үүнд засаглалыг нь хараат бус байлгах, бизнесийн зарчмаар ажиллуулах, уул уурхайн компаниудын өдөр тутмын үйл ажиллагаанд оролцохгүй байх, харин хөрөнгө удирдах, олон улсын зах зээлээс хөрөнгө босгох чиглэлд үйл ажиллагааг нь төвлөрүүлэх шийдвэр гаргалаа.

Үндэсний баялгийн сангийн тухай хуульд “Эрдэнэс Монгол” ХХК-ийг Хуримтлалын санд орлого төвлөрүүлэгч байхаар тусгасан байдаг.

Засгийн газрын хуралдаанаас "Төрийн өмчит компани"-ийн шинэчлэлийн хүрээнд “Эрдэнэс Монгол” нэгдлийн харьяанд буй үр ашиггүй, чиг үүргийн давхардалтай 10 компанийг татан буулгах үүрэг, чиглэлийг өглөө. Түүнчлэн томоохон олборлолт эрхэлдэг аж ахуйн нэгжүүдийн бүтээмжийг сайжруулах, орон тоог цомхотгох, ялангуяа удирдах албан тушаалтны тоог бууруулах чиглэл өгсөн байна. 2026 оны зургаадугаар сарын 15-ны дотор дээрх 10 төрийн өмчит компанийг татан буулгах асуудлыг шийдвэрлэхээр болсон. 

Мөн ТӨК-үүд өндөр шилэн барилгад байрладаг байдлыг зогсоох ёстой. Цаашид сул орон байр, хөрөнгүүдээ ашиглаж, түрээсийн төлбөрийг бууруулна. Мөн хотод төлөөлөгчийн газартай уурхайнуудыг уурхай дээрээ ажилла, хотод байрлах шаардлагагүй гэдэг зарчмыг Засгийн газраас гаргаж байна. 

Шинэчлэлийг хэрэгжүүлснээр 260 орчим орон тоог оновчтой болгох үр дүн гарна гэж үзэж байгаа бөгөөд захиргааны зардлыг 10 хувь, түрээсийн зардлыг 30 хувиар бууруулахаар шийдвэрлэжээ. Ингэснээр нийт 67 тэрбум төгрөгийн хэмнэлт гарна гэж тооцож байна" гэв.