Аймгийн Засаг даргын “Шинэ Дорноговь-II” тогтвортой хөгжлийн хөтөлбөрийн “Өндөр ур чадвартай эмч мэргэжилтнийг урилгаар ажиллуулах ажлыг зохион байгуулна” гэсэн зорилтын хүрээнд иргэдийн дундах нүдний өвчлөл ихсэж байгаатай холбогдуулан аймгийн Засаг даргын ивээл дор нүдний нарийн мэргэжлийн үзлэг, оношлогоо, эмчилгээ, мэс заслын чиглэлээр үйл ажиллагаа явуулдаг “Солонго” эмнэлгийн эмч нарын үзлэгийн нээлтийн ажиллагаа аймгийн Нэгдсэн эмнэлэгт болж үзлэг, оношлогоо, эмчилгээ эхэлж ард иргэдийг үзэж байна.

Тус үзлэг, оношлогоо, эмчилгээ хийхээр Солонго эмнэлэг нь ерөнхий эмч АУ-ны докторант Г.Нарангараваар ахлуулсан 11 эмч, сувилагч нарын бүрэлдэхүүнтэй Дорноговь аймагт 9-р сарын 10-12-ны өдрүүдэд ажиллана.

Дашрамд дурдахад Солонго эмнэлэгт нэг удаа үзлэг, оношлогоо хийхэд 30-50 мянган төгрөг байдаг бөгөөд манай аймагт үнэ төлбөргүй үзлэг зохион байгуулж байгаа нь онцлог юм.

Уг үзлэгийг зохион байгуулснаар нүдний нарийн мэргэжлийн үзлэг, оношилгоонд орон нутгийн иргэдээ хамруулж, тэдний цаг хугацаа, эдийн засгийг хэмнэж, шаардлагатай мэс заслын асуудлыг шийдвэрлэх юм.