Өнөөдөр Сүхбаатар дүүргийн шүүхийн Эрүүгийн танхимд МАХН-ын дарга
Н.Энхбаярт холбогдох авилгалын хэргийн шүүх хурал боллоо. Хуралд
Н.Энхбаяр өөрийн биеэр хүрэлцэн ирэв. Мөн даргалагч шүүгчээр
С.Соёмбо-Эрдэнэ, шүүгчээр М.Алдар, С.Оюунчимэг, улсын яллагчаар
Е.Сагсай, О.Мөнхбаатар, өмгөөлөгчөөр Б.Оюунбилэг нар оролцлоо. Хурал
10.00 цагт эхэлсэн ч Н.Энхбаяр өөрийн өмгөөлөгч Г.Ганбаатар, Н.Шинэн
нараас татгалзах хүсэлт гаргаж, шүүх бүрэлдэхүүн хүсэлтийг хүлээн авч
найм хоногоор буюу энэ сарын 12-ны өдрийг хүртэл хойшлуулав. Тэрээр
өмгөөлөгч нараасаа татгалзсанаар түүнд Б.Оюунбилэг, О.Баасанхүү нар
өмгөөлөл үзүүлэхээр болжээ. Тиймээс шинэ өмгөөлөгчдөд хавтаст хэрэгтэй
танилцах найм хоногийн хугацаа өгснөөр шүүх хурал ийнхүү хойшиллоо.
Хурлын дараа түүнийг эмнэлгийн машинаар авч явсан юм.
/24tsag.mn/
