Удаан бодсоны эцэст чи цагаан хоолтон болохоор шийджээ. Гэхдээ юунаас эхлэх, яахаа сайн мэдэхгүй л байгаа байх. Магадгүй амьдралынхаа тогтсон хэв маягийг нэг л өдөр огцом өөрчлөнө гэдэг чиний хувьд боломжгүй санагдаж байгаа. Тиймээс аажуухнаар өөртөө дасгахын тулд эдгээр энгийн алхмуудаас эхлээрэй.1. Чи яагаад цагаан хоолтон болохоор шийдсэн бэ?
Чамд анх цагаан хоолтон болох санаа юунаас ч болж төрсөн байж болно. Ёс суртахууны, заншлын, шашны, эсвэл амьтдыг, байгалийг хайрлах сэтгэлийн гэх мэт ямар ч шалтгаан байсан тэр чинь чиний хувьд үнэт зүйл болж чадахуйц хүчтэй байх ёстой. Чиний хувьд яагаад цагаан хоолтон болох нь махан хоолтон байхаас дээр гэж үзэж байна вэ? Хэрэв чи зүгээр л сонирхлоороо ингэж шийдэх юм уу, шалтгаан чинь хүчтэй байж чадахгүй бол хэдэн сар, магадгүй хэд хоног цагаан хоол идээд л шантрах болно. Хэцүү дээ биш шүү, харин ямар ч хүний хувьд амьдралын хэв маягаа солих нь тийм ч амархан болчихдог зүйл биш учраас тэр. Тиймээс эхлээд өөртөө цагаан хоолтон болох том шалтгаануудыг ол, тэгээд түүндээ чин сэтгэлээсээ итгэ. Болохгүй бол бичиж тэмдэглэ. Тэгээд л үлдсэн нь хялбархан.
2. Цагаан хоолны жор хайж ол.
Эхний ээлжинд тэдгээрээс өөрийнхөө сонирхлыг татаж байгаа жорыг туршиж үз. Магадгүй зарим хоол нь махан хоолноос ч илүү амттай, шинэлэг байх учир чиний аппетитийг хөдөлгөх болно. Хамгийн гол нь чиний хувьд цагаан хоол идэх нь таашаалтай, амттай байх ёстой. Супермаркетаар явж байхдаа сонин содон шинэ жимс, ногоо олж хар. Бууцай, спинач зэрэг нарийн ногоо анар, грейпфрут, манго зэрэг “нандин” жимснүүд гадуур элбэг байдаг болсон. Мөн янз бүрийн үр тариагаар хийсэн талх амсаж үз. Мөн дэлгүүрүүдэд мах орлуулагч шинэ төрлийн бүтээгдэхүүнүүд гарсан гэдгийг дуулгая.
3. Эхлээд махан хоолноос бүрмөсөн татгалзалгүйгээр, өдөр тутмын хүнсэндээ цагаан хоолыг аль болох түлхүү оруул.
Үхрийн мах, хонины махнаас татгалзахаасаа өмнө, цагаан хоолонд дуртай болоод авчих. Ингэхийн тулд мэдээж сайхан амттай цагаан хоол ихийг идэх хэрэгтэй. Эхлээд үхрийн махны оронд тахиа, загас, гахайн мах иддэг бол. Энэ дэглэмээрээ хэдэн долоо хоног явсны дараа чамд эдгээр төрлийн махнуудаас ч бас татгалзах маягаар өөртөө дасгаарай. Хамгийн гол нь өөртөө зөв санагдсан сонголтоо л хий, цагаан хоолтон болох нь зоригтой алхам бөгөөд хүн болгоны хийдэг зүйл биш гэдгийг сана. Мөн өөрийнхөө өглөө, өдөр, оройн хоолонд иддэг орц найрлагуудаа жагсааж бичээд, тэдгээрийг орлуулж болох цагаан хүнсний бүтээгдэхүүнүүдийг дэргэд нь бичээрэй.
4. Хангалттай уураглаг хүнс хэрэглэ.
Зарим хүмүүс махнаас нэг л өдөр шууд татгалзчихдаг. Энэ сонсогдож байгаа шигээ хэцүү биш юм, тиймээс дээрх алхмуудыг хийснийхээ дараа шийдэмгий бай. Хэд хоногийн дараа гэхэд л бие организм чинь дасчихна. Цагаан хоолтнуудыг хангалттай уураг авч чаддаггүй гэцгээдэг, гэхдээ буурцаг, үр тариа, вандуй, самар, хүнсний ногоо зэргийг хангалттай хэрэглэж байвал чи яах ч үгүй. Цагаан хоол иднэ гэдэг хоолоо хасна гэсэн үг биш, харин махнаас авдаг шим тэжээлээ өөр байгалийн гаралтай хүнсээр орлуулж сурахын нэр юм. Янз бүрийн уураглаг бүтээгдэхүүнийг нэг дор хэрэглээрэй. Цагаан хоолтнууд махан хоолтноос илүү эрүүл байдгийн учир нь тэдний хувьд чихрийн шижин, зүрхний өвчин, хорт хавдар тусах магадлал бага байдаг. Гэхдээ насанд хүрсэн хүний өдөрт авах ёстой уураг, амин дэм, эрдэс бодисуудын хэмжээг судлаж, түүнээс дутуудуулахаас сэргийл. Одоо чи цагаан хоолтон болох гэж байгаа учраас, жирийн хүмүүсээс илүү идэх юмандаа анхааралтай хандах ёстой.
5. Гэр бүл ойр дотныхондоо дуулга. Хөгжилд.
Чи тэдэнтэй сууж хооллох хэрэг их гарах учраас ярилцах хэрэгтэй. Тэгвэл ядаж л баяр ёслолын үеэр бүгд цуглахад ээж чинь, эсвэл эгч чинь зөвхөн чамд зориулж цагаан хоол тусгайлан бэлдэж сурах болно. Тэдэнд яагаад энэ шийдвэр чиний хувьд чухал гэдгийг сайтар тайлбарлаарай. Мөн энэ бол ганцхан чиний шийдвэр учраас өөр хэн нэгнийг өөртэйгөө адилхан цагаан хоолтон болохыг ятгаж болохгүй. Цагаан хоол идэх нь чамд ял хүлээж байгаа мэт мэдрэмж төрүүлэх ёсгүй, харин биеэ эрүүлжүүлж, амьтдад болон байгальдаа ээлтэй сайн зүйл хийж байгаа мэт санагдах ёстой. Өдрийн хоолоо гэрээсээ авчраад идэж болно, эсвэл гадуур олнооро нээгдээд байгаа цагаан хоолтны зоогийн газрыг зоригтун.
6. 100 хувь цагаан хоолтон болох албагүй.
Цагаан хоолтны олон төрөл байдаг. Жишээ нь “Flexitarian” –ууд буюу холимог идэштнүүд нь ихэнх өдрүүдэд цагаан хоол иддэг ч, хааяа хааяадаа махан хоол идэхийг өөрсөддөө зөвшөөрдөг хүмүүсийг хэлнэ. Долоо хоногийн 6 өөр нь цагаан хоол, нэг өдөр нь махан хоол идэж ч болно. Харин Pesci–vegetarian-ууд бол загас, сүү цагаан идээ, өндөг идэж болдог, зөвхөн мах, махан бүтээгдэхүүнээс татгалздаг хүмүүсийг хэлнэ. Аль нь чамд тохиромжтой байна, түүнийг л сонго.
7. Чиний гал тогоонд ямар хүнс зайлшгүй байх ёстой вэ?
Жимс: Цитрусын төрлийн жимс, гүзээлзгэнэ, алим, хатаасан жимс. Хар ногоон навчит ногоо: Брокколи, Кале, Спинач. Шар ногоо: лууван, төмс. Шошны төрлийн хүнс: шош, мэшил, вандуй. Үр тариа: бор будаа, бүхэл үрийн талх, гоймон, эрдэнэшиш, овъёос. Буурцагны төрлийн хүнс: шар буурцагны мах, буурцагны сүү, дүпү.
8. Цагаан хоолтон алдартнууд.
Түүхэн хүмүүс: Генри Форд, Томас Эдисон, Альберт Эйнштейн, Бенжамин Фрэнклин, Дорис Дэй, Леонардо Да Винчи.
Шоубиз: Элле Макферсон, Боб Марли, Том Круз, Памела Андерсон, Самуэл Жексон, Брайн Адамс, Орландо Блүүм, Боб Дилан, Жюд Лоа, Пол Маккартни, Натали Портмэн, Шаниа Твейн.
