ХҮН-ын Ерөнхий нарийн бичгийн дарга Т.Доржхандыг үүрэгт ажлаас чөлөөлсөн нь багагүй асуудал үүсгэж, ид яригдаж байна. Тус намын дарга С.Ганбаатар дур мэдэн шийдвэр гаргаж, Т.Доржхандыг огцруулсан гэх мэдээ хүртэл цацагдсан.

Тэгвэл тус намын ерөнхий нарийн бичгийн дарга Т.Доржхандыг үүрэгт ажлаас нь чөлөөлөх дугаар № 01 бүхий намын даргын тушаал гаргажээ. Мөн намын дүрмээр олгосон бүрэн эрхийг хэтрүүлж, Намын төв хороо, Удирдах зөвлөлийн бүрэн эрхэд халдаж, хуралдахгүйгээр хууль бус шийдвэр гаргасан Хариуцлагын ерөнхий хорооны бүрэн эрхийг Намын төв хороо хуралдах хүртэл хугацаанд түдгэлзүүлэх тухай дугаар № 02 тоот тушаалыг ХҮН-ын дарга С.Ганбаатар гаргасан байна.

Энэхүү шийдвэрийг намын Төв хорооны гишүүдийн олонх нь дэмжиж гарын үсгээ зуржээ. ХҮН-ын Төв хороо нь Улаанбаатар хот болон 21 аймаг, сум дүүргийн нийн 56 гишүүнтэй бөгөөд тэдний 41 гишүүн буюу 74 хувь нь намын дарга С.Ганбаатарын гаргасан № 01, 02 тушаалуудыг  дэмжсэн байна.