Өнөөдрийн байдлаар  ХӨСҮТ-д 629 хүн хэвтэн эмчлүүлж байгаагаас халдвартын тасагт 440 хүн, үүний   412 улаанбурхан өвчиний улмаар эмчлүүлж байна.  Эдгээрээс 17  нь сэхээн амьдруулах эрчимт эмчилгээний тасагт эмчлэгдэж байгаа аж.  Өвчлөлийн насны хувьд 33%-ийг 15-29 насныхан, 15%-ийг 0-8 сартай  буюу вакцин тариулах нас болоогүй хүүхдийн өвчлөл эзэлж байна. Засгийн газрын 3 дугаар сарын 16-ны өдрийн хуралдаанаар Улаанбурхан өвчний дэгдэлтийг бууруулах талаар хэлэлцэн 159-р тогтоол  гарган  өвчлөл өндөр бүртгэгдэж байгаа 18-30 насныхны нэмэлт дархлаажуулалтад шаардагдах зардал болох 948 сая төгрөгийг Засгийн газрын нөөц хөрөнгөнөөс гарган дархлаажуулалтыг зохион байгуулахаар шийдвэрлэсэн. Энэ зардлаар 627 500 хүн/тун вакцин, дагалдах хэрэгслийн хамт авна. 3 дугаар сарын 17-нд НҮБ-ын Хүүхдийн санд вакциныг албан тоотоор захиалж, яаралтай нийлүүлэх арга хэмжээг авахаар зохион байгуулан ажиллаж байгаа юм байна.

ХӨСҮТ-д нөөцөнд голомтод хийх 10 000 гаруй мянган хүн/тун вакцин байгаа бөгөөд товлолоор хүүхдэд хийх 75 000 хүн/тун байна. Эрүүл мэнд, спортын сайдын тушаалаар тархвар зүйн, эмнэлзүйн, санхүүгийн зөвлөх багийг томилон ажиллуулж байгаа аж. Эмнэлзүйн баг нь ХӨСҮТ-д 7 хоногт 2-3 удаа ажиллаж, зөвлөгөө өгч байна. Энгийн үед хоногт 7 эмч хонодог байсан бол 14 эмч хонон 26 сувьлагч хонодог байсан бол 45-50 сувьлагч хонон ажиллаж байгаа гэж ХӨҮТ-өөс мэдээлж байна.  Өнөөдрийн байдлаар Улаанбурхан өвчний голомтын хүрээний 50000 гаруй хүнийг улаанбурхан, улаануудын эсрэг вакцинаар дархлааажуулаад байна. Өвчлөл өндөр байгаа Увс, Сэлэнгэ, Орхон, Ховд, Хэнтий, Өмнөговь,  Дорнод аймгуудад ХӨСҮТ-өөс мэргэжлийн баг ажиллаж, дэмжин туслах үйл ажиллагааг хэрэгжүүлсэн. Түүнчлэн Улаанбурхан өвчний талаар 21 аймгийн ЭМГ-ын мэргэжилтнүүдэд цахим хурлыг тогтмол хийж, мэргэжил арга зүйн зөвлөмж өгч ажиллаж байгаа юм байна. Нийслэлийн эмнэлгүүдэд дэмжлэгт хяналт, хийж, 500 гаруй эмч мэргэжилтнийг сургалтад хамруулжээ.