Сонгуулийн сурталчилгааны үеэр МАН-ын удирдлагууд болох М.Энхболд Нийслэлийн МАН-ын дарга Ц.Сандуй нарын төрийн албыг 60 тэрбумаар наймаалцаж буй аудио бичлэг олон нийтэд цацагдсан. Тухайн үед АН-ын удирдлагууд уг бичлэгийг шалгуулахаар хууль хяналтын байгууллагад хандаад байсан юм. Тодруулбал, УЕПГ болон ТЕГ, АТГ, ЦЕГ-т хандсан.

Тэгвэл эл асуудлыг УЕПГ-аас шалгасан талаар өнөөдөр УЕПГ-ын Дотоод аюулгүй байдлын хэлтсийн дарга Э.Амарбат мэдээлэл өглөө.

Тэрбээр “АН-ын дарга З.Энхболдын гаргасан гомдлыг манайх хүлээж аваад харьяаллынх нь дагуу АТГ-д шилжүүлжсэн бөгөөд тэндээс уг асуудлыг хянаж үзээд шүүх шинжилгээний үндэсний хүрээлэнгээс зохих шинжээч мэргэжилтэн томилж, уг бичлэгийн асуудлаар дахин дүгнэлт гаргуулсан байна. Уг дүгнэлтээр бичлэг нь өөрөө эвлүүлэг байна гэж гарсан. Хоёрдугаарт шалгалтын явцад уг яриатай холбоотойгоор аль нэг төрийн болон нийслэлийн байгууллагад хэн нэгнийг албан тушаалд томилох зорилгоор бусдаас хууль бусаар хөрөнгө мөнгө цуглуулсан, төвлөрүүлсэн тийм асуудал тогтоогдоогүй. Ийм учраас уг асуудалд эрүүгийн хэрэг үүсгэхээс татгалзсан юм” гэлээ.

Т.Энхэлээ