Сүүлийн жилүүдэд хууль хүчний байгууллагынхан эрх мэдлээ хэтрүүлэн ашиглаж, бусдын нэр хүндэд халдах явдал газар авч, өдгөө энгийн үзэгдэл боллоо. Хамгийн сүүлд л гэхэд АТГ-ын шалгаж буй хэрэг болох Н.Алтанхуягийн ойр дотныхныг цагдан хорьж, шалгаж буй хэргийн талаар Нийслэлийн прокурорын газрын олон нийттэй харилцах ажил хариуцсан хяналтын прокурор Г.Бясман хэвлэл мэдээллийн хэрэгслээр олон нийтэд мэдээлэл өгөв.
Аливаа хэргийн гэм буруу нь шүүхээр тогтоогдоогүй байхад хэнийг ч буруутган, хэрэгтэн хэмээж болохгүй талаар хар дээр цагаанаар бичиж, хуульчилсан байдаг. Гэтэл Авлигатай тэмцэх газрын Мөрдөн шалгах хэлтсээс мөрдөн байцаалтын ажиллагаа явуулж байгаа Н.Наранцэцэг, Ц.Насанбат нарт холбогдох хэргийн талаар хяналтын прокурор Г.Бясман өгүүлэхдээ “Боловсрол Соёл шинжлэх ухааны яам, зарим дүүргийн Тамгын газраас зарлан явуулсан нийт 4.2 тэрбум төгрөгийн санхүүжилт бүхий тендер хууль бусаар явагдсан байдаг. Дээрх ажлын хүрээнд улсын төсвөөс авсан санхүүжилтийн зарцуулалттай холбоотойгоор Н.Наранцэцэг, Ц.Насанбат нарын зэрэг хүмүүсийг сэжигтнээр тооцож, цагдан хорих таслан сэргийлэх арга хэмжээг авсан. Ц.Насанбатын нөхөр нь Ерөнхий сайд асан Н.Алтанхуягийн төрсөн эгчийн хүү, харин Н.Наранцэцэг нь түүний төрсөн дүү юм” хэмээн тэднийг цоллосон байх юм.
Уг нь прокурорын ёс зүйн дүрмийн 3.3-т "Прокурор нь хувийн сонирхлын үүднээс харъяаллын бус, бусдын хяналтанд байгаа хэрэг, материалтай танилцах, зөвлөгөө өгөх, хэрэг бүртгэгч, мөрдөн байцаагч, прокурор, шүүгч шинжээч нарт өөртөө ашигтай болон үндэслэлгүй шийдвэр гаргуулах хүсэлт тавихыг цээрлэж, хэрэг шийдвэрлэх ажиллагаанд нь хөндлөнгөөс оролцож, дарамт шахалт үзүүлэхгүй байна", З.4-т "Прокурор нь хуульд заасан үндэслэл, журмын дагуу эцэслэн шийдвэрлэгдээгүй байгаа хэрэг, материалын талаар урьдчилан дүгнэлт гаргах саналаа илэрхийлэхээс зайлсхийж, хуулиар зөвшөөрснөөс бусад тохиолдолд хэрэг, материалын талаар хэвлэл, мэдээллийн хэрэгслээр нийтэлж, нэвтрүүлэхгүй байна" хэмээн заасан байх аж. Гэтэл юуны учир шүүхээр тогтоогдоогүй байгаа хэргийн талаар ийнхүү мэдээлж, бусдын нэр төрд халдаж буй нь хачирхалтай.
Харин энэхүү үзэгдэл нь “Шинэчлэл”-ийн Засгийн газрыг огцруулахад АТГ-ынханы хийж байсан мэдэгдэлтэй яг адил зүйл болж буй нь өдгөө олны анхаарлыг татаж байна.
Тухайн үед АТГ-ын эрх бүхий албан тушаалтанууд ”Шинэчлэл”-ийн Засгийн газраас хэрэгжүүлж буй “Нүүрс” хөтөлбөрөөс Ерөнхий сайдын ахлах зөвлөх Л.Гансүх нар нь 3.2 тэрбум төгрөг “идсэн” хэмээн цоллож, Л.Гансүх нарыг цагдан хорьж, улмаар Засгийн газрыг огцруулж байсан түүхтэй. Гэтэл энэхүү олон тэрбум төгрөгийн хэрэг нь шүүхийн явцад үнэн мөн нь тогтоогдож, тус хэрэгт буруутан хэмээн бүтэн 6 сар хоригдсон бүсгүйн хэрэг хүртэл цагаадаж байсан билээ.
Тэгвэл энэ хүртэл эдгээр хүмүүсийг олон нийт хэрэгтэн, улсаас олон тэрбум төгрөг идсэн увиагүй “амьтад” хэмээн харж, гоочилж байсныг хууль хүчний байгууллагын алдаатай үйл ажиллагаанаас болж хохирсон хүмүүс хэлдэг. Хэрэв тэднийг ийнхүү хэвлэлээр хэрэгтэн, олон тэрбум төгрөг идсэн хэмээн мэдээлээгүй бол тэдний хэрэг шүүхээр үнэн мөн нь тогтоогдоод л явах байсан.
Ер нь сүүлийн жилүүдэд хэн нэгний хэрэг хийсэн нь шүүхээр тогтоогдоогүй байхад хэрэгтэн, улсаас олон тэрбум төгрөг завшсан хэмээн олон нийтэд мэдээлж улмаар нэр хүндийг нь унагаж, ажил үйлсийг бүтэлгүйтүүлэх бодлогыг хууль хүчний байгууллага зохион байгуулалттай явуулдаг болсон талаар ч олон хүн хэлэх болсон. Үүний эх үндэсийг АТГ тавьсан гэхэд ч нэг их хилсдэхгүй болов уу. Тэд анх “Нүүрс”-ний хэргийг олон нийтэд мэдээлж багагүй шүүмжлэлд өртөж байсан. Харин өдгөө өөрийн шалгаж буй хэргийнхээ талаар прокурор, цагдаагийнханаар мэдээллүүлдэг болсон юм уу гэх хардлага ч төрөх болов.
Н.Алтанхуягийн дүү нарт холбогдох хэргийн талаар өдгөө прокурор мэдээлж суугаа бол УИХ-ын гишүүн асан Х.Баттулгын туслахыг цагдан хорьсон хэргийн талаар ЦЕГ-аас мэдээлж байв. Тодруулбал Х.Баттулгын туслах эмэгтэйг Төмөр замын гэх хэрэгт буруутган шалгаж байгааг тэд өгүүлсэн байдаг. Тэгвэл эл хэргийг АТГ, ЦЕГ-аас хамтарсан ажлын хэсэг гаран шалгаж, мөрдөн байцаалтын ажиллагааг явуулж байсан юм.
Мөн л олон тэрбум төгрөгийн хэрэгтэн хэмээн цоллуулсан Х.Баттулгын туслах эмэгтэйчүүдийн хэрэг өдгөө мөн л нам гүм болоод байгаа. Хууль хүчний байгууллагын хэрэгтэн хэмээн цоллуулж, адлуулсан хүмүүсийн жагсаалтыг “Жаст” группын ерөнхийлөгч Ш.Батхүү үргэлжлүүлнэ. Түүнийг АТГ-аас Өмнөд Африкийн “Стандарт” банкнаас “Эрдэнэт” үйлдвэрээр батлан даалт гаргуулж, ТӨХ, “Эрдэнэт” үйлдвэрийн удирдлагуудын гарын үсгийг хуурамчаар үйлдэн зээл авч эргүүлэн төлөөгүй гэх үндэслэлээр анх эрүүгийн хэрэг үүсгэн жил дамнан шалгаж улмаар цагдан хориод хүртэл авсан билээ. Гэтэл хэрэг мөн л тэгэсхийгээд гэмт хэргийн бүрэлдэхүүнгүй хэмээн хэрэгсэхгүй болгож байсан.
Энэ мэтээр хэн нэгний галыг мөхөөх, эрх мэдэлтэнгүүдийн гар хөл болж цагдан сэргийлэх гэх ажиллагаа явуулдаг хууль хүчний байгууллагынхан алдаатай бодлогоо засч залруулахгүй бол олон хүн нэр хүнд, эрүүл мэндээр хохирох болоод байна. Хуулийнхан хуулиа биелүүлж, дээдлэж ажиллахгүй бол хэн өдгөө хуулийг гууль болгохгүй хууль чигээр нь авч үлдэх билээ.
24tsag.mn
Сэтгэгдэл (18)