Ардчилсан намын даргын сунгаа шувтарч буй энэ үед Ардчилсан намын байрны асуудал хөндөгдөж, Д.Сүхбаатарын талбайн зүүн талд байрлах, Соёлын Төв өргөөний хүзүүвчин дэх байр, түүний газрыг хэн хэрхсэн тухай асуулт олны анхаарлыг татаж эхлээд байна.

Дээхэн үед Социал Демократ намын төв оффис байгаад дараа нь Ардчилсан намын Төв байр болсон байшин хэдийн нураагдаж, суурин дээр нь "Ардчиллын ордон" баригдах зураг төсөл нь гарчихсан хэдий ч тэгсхийгээд сураг тасарсан. АН-ын төв оффис байрлаж буй шилэн хүзүүвчийг нурааж шинэ байр барих санаачлагыг Н.Алтанхуяг гаргаж байсан учраас түүнийг хардаж сэрдэх нь олон байсан. Товчхондоо Н.Алтанхуяг СТӨ-ний хүзүүвчин дэх байрыг зарж борлуулсан хэргийн эзнээр тодроод байв.

Ардчилсан намын Гүйцэтгэх зөвлөл хуралдаж 01 тоот тогтоол гарган "Ардчилсан намын Үндсэн дүрмийн 6 дугаар зүйлийн 6-гийн 6 дахь заалтыг үндэслэн тогтоох нь: Ардчиллын өргөө цогцолбор барилгын ажлын хэсгийн дүгнэлтийг үндэслэн Ардчиллын өргөө барилгын суурийг дуудлага худалдаагаар худалдахыг Ардчилсан намын Хэрэг эрхлэх газарт, Ц.Оюундарьд даалгасугай"

Гэтэл хумсаа нуун чимээгүйхэн сууж байсан жинхэнэ хэргийн эзэн нь Ардчилсан намын даргын сунгааны шуваргын "тоглолт"-ын үеэр илэрлээ.

Тодруулбал, Ардчилсан намын байр байрлаж байсан хүзүүвчний суурийг дуудлага худалдаагаар худалдах саналыг 2013 оны 9 дүгээр сарын 10-нд Ардчилсан намын Гүйцэтгэх зөвлөлөөс гаргаж байжээ. Намын дотоод журмаар Гүйцэтгэх Зөвлөлийг Ерөнхий нарийн бичгийн нь өөрөө даргалдаг бөгөөд тухайн үед АН-ын генсек байсан Ц.Оюундарь энэ хурлыг даргалан хийжээ. Энэ хурлаас 01 тоот тогтоол гаргаж Ардчилсан намын Үндсэн дүрмийн 6 дугаар зүйлийн 6-гийн 6 дахь заалтыг үндэслэн тогтоох нь: Ардчиллын өргөө цогцолбор барилгын ажлын хэсгийн дүгнэлтийг үндэслэн Ардчиллын өргөө барилгын суурийг дуудлага худалдаагаар худалдахыг Ардчилсан намын Хэрэг эрхлэх газарт, Ц.Оюундарьд даалгасугай" гэсэн тогтоол батлуулаад Ерөнхий нарийн бичгийн даргын хувьд Ц.Оюундарь өөрөө гарын үсэг зурж байжээ.

Чухам энэхүү шийдвэрээс бүх асуудал эхэлсэн бөгөөд тэр даруй тендер зарлаж уг тендерт Худалдаа хөгжлийн банк, Улаанбаатар хотын банк гэх хоёр банкнаас санал ирүүлж нэг нь ялагч болжээ. Ийнхүү эзэн холбогдогч ч үгүй, хэн авсан нь ч мэдэгдэхгүй байсан барилгын суурийг зарсан эзэн, авсан эзэн хоёр тодорхой боллоо.

Харин Ардчиллын өргөөний суурийг зарсан мөнгө хэний хэтэвчинд орсон нь бас л олны анхаарлын төвд байсан юм. Тэгвэл энэ талаар УИХ-ын гишүүн асан Г.Батхүү бүхнийг илчиллээ. Тэрбээр "Хоёр удаагийн Ерөнхийлөгчийн сонгуулийн зардалыг энэ хойно байгаа газрыг зарж дарсан шүү дээ бид. Хуучин Соцдекийн байр байсан, дараа нь Ардчилсан намын байр байсан хоолойг ажлын хэсэг байгуулаад 24 давхар байшин бариад, 2 давхар хурлын заалтай нь, 2 давхар гражтай нь үнэгүй авахаар яриад яг хөрөнгө оруулалт хийгдэх гэж байхад тендер зарлаад зарчихсан шүү дээ" хэмээн хэргийн эзнийг бариад өгчихөв.

Өөрөөр хэлбэл "Ардчиллын өргөө"-ний суурийг зарж олсон мөнгийг хоёр удаагийн Ерөнхийлөгчийн сонгуульд зарцуулсны гайгаар Ардчилсан намынхан байргүй болж хоцорчээ.