Он гарсаар АТГ “задарсан” гэгдээд буй аймаг, дүүргийн Засаг дарга нарыг “эрүүдэж” эхэлсэн. Энэ хугацаанд 21 аймаг, 9 дүүргийн 11 засаг даргын хэргийг шалгаж, зургаан засаг даргын хэргийг эцэслэн шийджээ. Харин таван засаг даргын хэрэг шийдэгдээгүй байгаа юм байна. Ингээд засаг дарга нарын хэрэг хэрхэн шийдэгдсэн, ямар шатандаа явааг эргэн сануулж байна.
    Он гарсаар АТГ “задарсан” гэгдээд буй аймаг, дүүргийн Засаг дарга нарыг “эрүүдэж” эхэлсэн. Энэ хугацаанд 21 аймаг, 9 дүүргийн 11 засаг даргын хэргийг шалгаж, зургаан засаг даргын хэргийг эцэслэн шийджээ. Харин таван засаг даргын хэрэг шийдэгдээгүй байгаа юм байна. Ингээд засаг дарга нарын хэрэг хэрхэн шийдэгдсэн, ямар шатандаа явааг эргэн сануулж байна.


   Увс аймгийн Засаг дарга Э.Цасчихэр, ИТХ-ын дарга Д.Батсайхан нарыг төсвийн мөнгө шамшигдуулсан гэм буруутайд тооцож, анхан шатны шүүхээс 2-3 жилийн хорих ял оноогоод байсан. Гэвч тэд анхан шатны шүүхийн шийдвэрийг эсэргүүцэн давж заалдах шатны шүүхэд гомдол гаргасан билээ. Тэдний гомдлыг тун удахгүй Нийслэлийн шүүхэд хэлэлцэх юм. Өмнө нь хоёр удаа хэлэлцэхээр товлогдсон ч өмгөөлөгч ирэх боломжгүй, шүүгч гадаад явсан гэх шалтгаанаар хойшлоод бйасан юм. Э.Цасчихэрийг Увс аймагт барихаар төлөвлөсөн Нарийны голын 325 км, Тээлийн голын зам, гүүрийн барилгын ажлыг өөрийн “Мөнхжим” компаниар гүйцэтгүүлэхээр 710 сая төгрөг завшсан, төрийн албан хаагчдын таван давхар орон сууцыг дөрвөн давхар болгон барьсан гэх иргэдийн мэдээллээр АТГ-т шалгаж, Эрүүгийн хуулийн 263 дугаар зүйлд заасан төрийн албан тушаалтан албан тушаал эрх мэдлээ хэтрүүлж, онц их хэмжээний хохирол учруулсан гэсэн үндэслэлээр ялласан юм.


    Багануур дүүргийн Засаг дарга Ц.Сандаг-Очирыг Газрын тухай хууль, тогтоомжоор тогтоосон журмыг зөрчиж газар олгосон гэсэн үндэслэлээр АТГ-аас Эрүүгийн хэрэг үүсгэн шалгаж байгаа. Одоогоор уг хэрэгт мөрдөн байцаалтын ажиллагаа явуулж байгаа юм байна. Мөн дүүргийн таван хороонд тус бүрийг нь 90 сая төгрөгөөр тооцон 450 сая төгрөгөөр эдэлгээ даах Япон, Солонгос машин сонгох чиглэл нийслэлийн Засаг даргаас өгөгдсөн ч Хятадаас машинуудаа нийлүүлсэн хэрэгт давхар шалгаж байгаа аж.


    Өмнөговь аймгийн МАН-ын хорооныхон Засаг дарга Б.Бадрааг дөрвөн тэрбум орчим төгрөг шамшигдуулсан гэж үзэж Авилгатай тэмцэх газарт гомдол гаргасан. Уг гомдлын дагуу АТГ-аас Б.Бадраад эрүүгийн хэрэг үүсгэн шалгаж, яллах дүгнэлт үйлдэж, шүүхэд шилжүүлэхээр прокурорын байгууллагад шилжүүлсэн ч прокуророос түүний хэргийг хэрэгсэхгүй болгосон байна.
Б.Бадрааг Өмнөговь аймагт 14 километр хатуу хучилттай зам тендерийг өөрийн хөрөнгө оруулалттай “Далан говь” компанид өгч мөнгийг хувьдаа завшсан. Мөн Б.Бадрааг төсвөөс 180 сая төгрөг хувьдаа завшсан хэмээн шалгаж байжээ.



    Орхон аймгийн Засаг дарга Д.Оюунбатыг эрх мэдэл, албан тушаалын байдлаа урвуулан ашигласан гэмт хэрэгт буруутган анхан болон давж заалдах шатны шүүхээс түүнд Эрүүгийн хуулийн 263 дугаар зүйлийн 263.2-д зааснаар тодорхой албан тушаал эрхлэх, үйл ажиллагаа явуулах эрхийг нь 2 жил хасч, 3 жил 6 сар хорих ял оногдуулаад байсан. Гэвч Улсын дээд шүүхийн хяналтын шатны эрүүгийн хэргийн шүүх хуралдаанаар түүнд холбогдох хэргийг хянан хэлэлцээд гэмт хэргийн бүрэлдэхүүнгүй гэж үзэж, хэрэгсэхгүй болгож, цагаатгасан билээ.


    Өнгөрсөн гуравдугаар сард АТГ-т Дундговь аймгийн 70 жилийн ойгоор цугларсан хандивын мөнгийг тус аймгийн Засаг дарга Д.Чандмань хувьдаа завшсан байж болзошгүй гэх гомдол иржээ. Гомдлын дагуу АТГ-аас шалгаж, эрүүгийн хэрэг үүсгэхээс татгалзаж шийдвэрлэсэн байна.


Сонгинохайрхан дүүргийн Засаг дарга Ц.Болдод холбогдох хэргийг Баянзүрх дүүргийн шүүхэд хэлэлцэж, нэмэлт мөрдөн байцаалтад буцаажээ. Түүнийг 2006 оноос хойш Нийслэлийн хот тохижилтын газрын даргаар ажиллаж байхдаа цас хайлуулах бодис худалдан авахад төсөвлөсөн хөрөнгөөс 300 сая төгрөг завшсан гэсэн үндэслэлээр АТГ-аас шалгаж, Нийслэлийн прокурорын газраас яллах дүгнэлт үйлдсэн юм. Улмаар Улсын дээд шүүхээс харьялал тогтоон, Баянзүрх дүүргийн шүүхэд шилжүүлсэн ч тус шүүхээс Ц.Болдыг буруутгаж буй ялын зүйлчлэл болон учруулсан хохирол нь тогтоогдохгүй байна хэмээн мөрдөн байцаалтад буцаажээ.


    Налайх дүүргийн Засаг дарга Б.Баяндэлгэрийг 320 га газрыг БНСУ-ын хөрөнгө оруулалттай “Жэхуан групп”-т их хэмжээний мөнгөөр зарахыг завдсан байж болзошгүй хэмээн ИТХ-ын 25 гишүүнээс найман гишүүн нь шалгуулах хүсэлт гаргасны дагуу АТГ-аас шалгасан байдаг. Мөн “Сеогёонг” компаниас “булаасан” газраа “Жэхуан групп”-ийнхэнд 300 мянган ам.доллараар “зарах” санал тавьсан. Мөн газрын гэрчилгээ өгөхөөс өмнө урьдчилгаа төлбөр хэрэгтэй гэдгийг ч хэлсэн зэрэг мэдээллээр шалгаж байсан юм. Гэвч мөрдөн байцаалтын явцад дээрх мэдээллүүд тогтоогдоогүй гэсэн үндэслэлээр Нийслэлийн прокурорын газраас Б.Баяндэлгэрт холбогдох хэргийг хэрэгсэхгүй болгожээ.


    Говьсүмбэр аймгийн Засаг дарга Ж.Баянмөнхийг тус аймгийн Татварын хэлтсийн даргаар ажиллаж байсан С.Мөнхжаргалаас хоёр сая төгрөгийн авлига авсан хэмээн 5.1 жилийн ял оноосон юм. Гэвч тэрээр анхан шатны шүүхийн шийдвэрийг эсэргүүцэж, давж заалдах шатны шүүхэд гомдол гаргасан. Уг гомдлыг Нийслэлийн шүүхээс хэлэлцэж, Шивээговь сум дахь орон нутгийн өмчит “Илчлэг шивээ” үйлдвэрийн газрыг өөрийн дотнын найздаа хувьчлахын тулд Өмч хувьчлалын комисс болон удирдлагадаа байгаа албан тушаалтнуудад хууль бус шаардлага тавьж, дарамталсан нь мөрдөн байцаалтын явцад тогдоогдоогүй хэмээн анхан шатнаас оноосон 5.1 жилийн хорих ялыг 2.6 жил болгон хөнгөрүүлжээ.


    Ховд аймгийн Засаг дарга Г.Нямдавааг АТГ-аас БНХАУ-аас аймгийнхаа гэрэлтүүлгийн хэрэгслийг авч, оронд нь их хэмжээний загас бариулах зөвшөөрөл өгсөн, Хөшөөтийн нүүрсний уурхайтай холбоотой, мөн хэд хэдэн тендер будилаантуулж, танил талдаа давуу эрх олгосон хэрэгт буруутган шалгаж байгаа. Түүний хэрэгт одоо мөрдөн байцаалтын ажиллагаа явуулж байна.


    Говь-Алтай аймгийн Засаг дарга Ш.Амгаланбаярын хэрэгтэй Сонгинохайрхан дүүргийн шүүгчид танилцаад, мөрдөн байцаалтын ажиллагаа дутуу, зүйлчлэлийг тодруулах шаардлагатай хэмээн мөрдөн байцаалтад буцаажээ. Түүнийг албан тушаал, эрх мэдлээ хэтрүүлэн бараа, ажил үйлчилгээг тендергүйгээр худалдан авч, танил талынхаа компанид давуу эрх олгосон хэрэгт буруутган АТГ-аас шалгаж, Нийслэлийн прокурорын газраас яллах дүгнэлт үйлдсэн. Улмаар Улсын дээд шүүхээс харьяалал тогтоон, Сонгинохайрхан дүүргийн шүүхэд шилжүүлээд байсан билээ. Хэргийг сануулбал, түүнийг ХХААХҮЯ-наас хөдөө аж ахуйг дэмжих зорилгоор 200 сая төгрөгөөр трактор, комбайн худалдан авах эрх олгосныг “Агсу-Алтай” гэх компанид тендергүйгээр 100 сая төгрөг шилжүүлсэн. Үлдсэн 100 саяыг нь хувьдаа завшсан хэмээн буруутгасан юм.


    Өвөрхангай аймгийн засаг дарга Д.Тогтохсүрэнг албан тушаалаа хэтрүүлэн ашиглаж, хууль бус үйлдэл хийж байгааг эсэргүүцэн тус аймгийн АН-аас мэдэгдэл гаргаж, АТГ-т шалгуулсан. Гэвч АТГ-аас шалгасны эцэст гэм буруутай нь тогтоогдоогүй учир хэргийг нь хэрэгсэхгүй болгож шийдвэрлэсэн байна.