Энэ жилийн парламент өмнөх жилүүдийнхээс олон зүйлээр ялгарч байна. Хамгийн олон эмэгтэй гишүүд гарсан, гурван ч бие даагч гишүүнтэй болсон. Мөн үүнээс гадна удам дамжсан гэр бүлийн гишүүн УИХ-д суусан тийм содон чуулган болов.

   Энэ жилийн парламент өмнөх жилүүдийнхээс олон зүйлээр ялгарч байна. Хамгийн олон эмэгтэй гишүүд гарсан, гурван ч бие даагч гишүүнтэй болсон. Магадгүй Засгийн газраа байгуулж чадахгүй хамгийн удаж байгаа чуулган ч болж мэдэх юм. Мөн үүнээс гадна удам дамжсан гэр бүлийн гишүүн УИХ-д суусан тийм содон чуулган болов.
    УИХ-ын гишүүн О.Содбилэгийг “Эрдэнэт”-ийн гэж хэлэгддэг УИХ-ын гишүүн Ш.Отгонбилэгийн хүү гэдгийг бүгд андахгүй мэднэ. Ш.Отгонбилэг 2000 онд Эрдэнэт хотоос биш харин Завхан аймгаас нэр дэвшсэн ч үнэмлэхүй ялалт байгуулж, гишүүнээр сонгогдож байсан. Түүнийг намынхаа арыг дааж, санхүүг нь хариуцдаг байсан гэх нь бий.  Харин Ш.Отггонбилэгийн халааг эхнэр  Д.Туяа нь авч Завхан аймагт нэр дэвшин 2004-2008 онд УИХ-ын гишүүн болж байв. Тэрбээр Эрүүл мэндийн яамны сайд болж, сүүлд Герман дахь ЭСЯ-ны зөвлөхөөр ажиллаж байсан туршлагатай улс төрч эмэгтэй. Харамсалтай нь түүнийг 2008 оны сонгуульд тойрог сэлгэж, Дундговь аймагт нэр дэвшиж, амжилттай явж байхад нь хүү О.Содбилэг нь сонгуулийн хууль зөрчиж Д.Туяаг цааш өрсөлдөх эрхгүй болгосон. Юу гэвэл, тэрбээр ээждээ туслах гэж шоу зохиосон нь харин ч эсрэгээрээ эргэсэн аж. Харин энэ жил Д.Туяа хүүгийнхээ сонгуулийн менежер болж, гишүүн болгож чадсан билээ. Хэдийгээр О.Содбилэг аав, ээжийнхээ сонгогдож байсан Завханы тойрогт нэр дэвшээгүй ч “Эрдэнэт"-ийн Отгонбилэгийн хүү гэдгээрээ олон санал авсан гэж ярьдаг.

   Д.Туяаг нөхрөөсөө 20 гаруй сая ам.долларын хөрөнгө өвлөж авсан, нийт хөрөнгө нь 100 сая ам.доллараар үнэлэгдэнэ гэх зэргээр түүний баялгийг хэмжсэн таамаглал олон байдаг. Харин О.Содбилэгт “Улаанбаатар” зочид буудал, “НИК” компани, “Uptown” сэтгүүл, “Капитрон” банк, “Эрдэнэт групп” гэх зэрэг олон том компаниуд харьяалагддаг. Тэрбээр УИХ-ын гишүүн болсноороо энэ бизнесээсээ бага зэрэг хөндийрөх ч байж магад.
Гэхдээ түүний орыг, гэр бүлийнхээ бизнесийг дүү О.Одмаа нь үргэлжүүлэхээр болж буй юм. Тэрбээр бас нэгэн улс төрчийн хүүтэй гэр бүл болж байгаа. Ирээдүйд улс төрд хөл тавихыг үгүйсгэхгүй.

   Үүнээс өмнө аав, ээж, хүү гурав парламентад үе дамжин сууж байсангүй тул гишүүний суудлыг өв залгамжлуулах шинэ жишиг тогтоож байна. Харин О.Содбилэг энэ дөрвөн жилд ямар аавын, ямар ээжийн хүү вэ гэдгээ харуулах үлдлээ.