Оросын ерөнхийлөгч Владимир Путин XIV Далай ламыг эх орондоо авчрах боломж бүрдүүлэх талаар үргэлжлүүлэн хүч тавина гэж өчигдөр залуучуудын асуултад хариулахдаа хэлжээ. Халимагийн залуучуудын төлөөлөгч уулзалтын үеэр түүнээс энэ талаар лавлажээ.
   -Энэ асуултын нарийн ширийнийг анзаардаггүй хүмүүст учирлаж хэлэхэд Далай ламыг дэлхий дахинд шашны бус улс төрийн зүтгэлтэн гэж хардагт асуудал байгаа юм. Халимагт амьдардаг манай иргэд Далай ламыг хүлээж байгааг бид мэдээж ойлгож байна. Энэ чиглэлээр ажиллах болно гэж Оросын төрийн тэргүүн хэлжээ. “Тийм” ба “Үгүй” гэдэг шууд хариултаас зайлсхийсэн гэж savetibet.ru сайт ерөнхийлөгч В.Путины мэдэгдлийг тайлбарласан байна.
    Түүнийг “энэ чиглэлээр” үнэхээр ажиллана гэдэгт ажиглагчид итгэхгүй байгаа юм. Далай ламыг авчрах эсэх нь Хятадтай харилцах харилцаанд ямар том бэрхшээл үүсгэхийг В.Путин мэдэж байгаа нь гарцаагүй. Европ дахь цор ганц ази төрхтөн, монгол үндэстэн болох халимагууд болон Буриад, Тувагийн сонгогчдод таалагдах гэсэн үг гэж энэ амлалтыг нь тайлбарлахаас аргагүй юм.

   1979 онд Далай лам анх ЗХУ-д ирж байв.1990 онд буюу Нобелийн энх тайвны шагнал хүртсэнийх нь дараа жил Зөвлөт улс түүнийг Улс түмний найрамдлын одонгоороо шагнаж байв. ЗХУ задран унаж шинэ Орос улс байгуулагдсан эхний жилүүдэд ч тэрээр Буриад, Халимаг, Тувагийн сүсэгтнүүдийн урилгаар айлчлан ирж байжээ. Гэвч Орос-Хятадын харилцаа сайжрахын хэрээр шашны тэргүүн, амьд бурхантайгаа уулзах Оросын сүсэгтнүүдийн хүсэл хаагдах болсон билээ. XIV Далай лам хамгийн сүүлд 2004 онд Халимагт айлчилснаас хойш Орос улс түүнд виза олгохоос татгалзах болжээ. Өнгөрсөн оны зун Эстонид айлчлахдаа Дээрхийн гэгээнтэн “том ах” буюу Оросыг Эстоны ардчилллаас суралцах хэрэгтэй гэж мэдэгдэж байжээ.
   Орос, Хятадын завсарт хавчуулагдсан жижигхэн Монгол харин аргыг нь олон Далай ламыг нутагтаа амжилттай айлчлуулсаар байгаа юм.