Тэрбээр ийнхүү Лондонгийн олимпоос монголчуудад хоёр дахь медалийг авчирч өөрөө олимпийн хошой медальт гэж дуудуулах болж байна. Н.Түвшинбаярын Бээжингийн олимпийн үеэр бэртэлтэй байсан нь сэдэрсэн ч тэрбээр тэвчээр заан барилдсанд монголчууд бахархаж байна.
Манай тамирчин Лондонгийн олимпийн наадмын өмнө дэлхийд чансаагаараа тавд бичигдэж байлаа. Харин Оросын Хван Хи долоод жагсаж байсан юм.


 Н.Түвшинбаяр мөнгөн медалийн  болзлыг БНСУ-ын жүдоч Хван Хи-тэй  барилдаж  хангасан. Тайландын жүдоч Теерават Хомклинийг ердөө 55 дахь секундэд цэвэр  ялснаар ялалтын буухиагаа эхлүүлсэн тэрбээр удаах барилдаандаа дэлхийн  аваргын хүрэл медальт, Францын жүдоч Тьерри Фабрег сөхрүүлж, улмаар  Узбекистаны жүдоч Рамзиддин Саидовыг Golden score буюу нэмэлт цагт үүрэх  мэхээр цэвэр ялснаар хэсгийн аварга болсон. 

 Узбекистаны жүдоч нь 2004 онд 81 кг-ын жинд Ази тивийн аварга болж  байсан, 2006 оны Дохагийн Азийн наадамд 90 кг-д зодоглож, хүрэл медаль  хүртэж байсан чамгүй хүчтэй өрсөлдөгч байлаа. Ингээд хагас шигшээ барилдаанд 90 кг-ын жинд дэлхийн аварга цол хүртэж байсан, Азийн наадмын хошой аварга, Азийн аваргын хошой мөнгөн медальт, БНСУ-ын жүдоч Хван Хи-тэйтэй барилдаж, юүко үнэлгээгээр яллаа. Барилдааны явцад манай тамирчны хөлийн бэртэл сэдэрсэн ч шүд зуун барилдаж, хүчтэй өрсөлдөгчөө буулган авсан юм.

Э.Мөнх