МАХН-ын дарга Н.Энхбаяр нарт холбогдох шүүх хурал гурван өдөр үргэлжилсний эцэст түүнд дөрвөн жилийн хорих ял оноолоо. Түүнийг Эрүүгийн хуулийн 150.3, 263.2-т зааснаар буруутган долоон жилийн хорих ял оноосон ч “Өршөөл үзүүлэх тухай хууль”-д хамруулан дөрвөн жилийг жирийн дэглэмтэй хорих ангид биечлэн эдлүүлэхээр болсон. Мөн түүний эзэмшлийн ТВ-9 телевизийн тоног төхөөрөмжийг улсын орлого болгож, дундын өмчлөлийн Сүхбаатар дүүргийн наймдугаар хороонд орших орон сууцнаас Н.Энхбаярт оногдох хувийг хураахаар болов. Түүнчлэн 982 сая төгрөгийг “Эрдэнэт” үйлдвэрт гаргуулж, 54 сая төгрөгийг Гандантэгчилэн хийдэд өгүүлэх шийдвэр гарсан билээ. Харин түүнтэй хамт шүүгдсэн До.Чулуунбаатарт Эрүүгийн хуулийн 150.3-т зааснаар 5.1 жилийн ял оноосон ч “Өршөөл үзүүлэх тухай хууль”-д хамруулан 2.1 жилийн хорих ялыг биечлэн эдлүүлэх, 10 сая төгрөгийг гаргуулах, Ж.Мягмаржаргалд Эрүүгийн хуулийн 150.3, 243.2-т зааснаар 6.6 жилийн ял оноосон ч “Өршөөл үзүүлэх тухай хууль”-д хамруулан 3.6 жилийн ялыг биечлэн эдлүүлэх, Лексус-470 маркийн машиныг хураахаар болсон юм. Д.Дуламсүрэнд Эрүүгийн хуулийн 150.3, 263.2-т зааснаар хоёр жилийн ял оноосон ч бүхэлд нь “Өршөөл үзүүлэх тухай хууль”-д хамруулан сулласан билээ.
Б.Чимэг
