Ирэх сарын долооны өдөр хуралдуулахаар товыг нь зарлаад байгаа Нийслэлийн МАН-ын Бага хурал ширүүн тэмцэл дунд өрнөх бололтой. Нийслэлийн саарал ордны хонгилоор чавхдах дэл сул яриагаар, МАН-ын нэр төрийг сэвтүүлсэн таван гишүүнээ хөөх асуудлыг энэ тэргүүнд авч хэлэлцэх гэнэ. Эл асуудалд хамгийн түрүүнд өртөж байгаа хүн нь мэдээж НИТХ-ын дарга асан Ц. Сандуй, Бямбасүрэн хоёроос гадна гурван ч хурган даргын нэр дуулдаж байна.
Үүний дараа үүрэг гүйцэтгэгчтэйгээр олон сарын нүүр үзэж байгаа Нийслэлийн МАН-ыг хэн тэргүүлэх асуудал яригдана. Өнөөдрийн байдлаар хэд хэдэн хүний нэр яригдаж эхлээд байна. УИХ-ын хоёр ч гишүүн нэрээ дэвшүүлж байгаа гэнэ. УИХ-ын гишүүн, Уул уурхай, хүнд үйлдвэрийн яамны сайд Д. Сумъяабазар түүний багын нөхөр болох УИХ-ын гишүүн Х.Нямбаатар нар нийслэлийн МАН-ыг тэргүүлэхээр санаархаж байгаа гэнэ. Гэхдээ энэ хоёр нөхөр нэг тоглолтойгоор хуралд орж ирэхийг үгүйсгэхгүй гэх яриа ч гарчээ. Д.Сумьяабазарын хувьд дарга болох сонирхлоо хэдийнээ илэрхийлээд эхэлсэн. Энэ хоёроос гадна хотын дарга Су. Батболд ч өрсөлдөх гэнэ. Үүрэг гүйцэтгэгчээр ажиллаж буй хүний хувьд, орон нутаг болоод УИХ-ын сонгуульд намаа нийслэлд авч гарсан менежерийн тухайд түүнд үгүй гээд хойш суух нь утгагүй байж мэднэ.
Ер нь Ерөнхийлөгчийн сонгуулиас хойш МАН-д хийж буй гол улс төр бол намын дарга нь Ерөнхий сайд болох тухай яриа болсон. Намын дарга нь Ерөнхий сайд болоогүйгээс нам доторхи хагарал Засгийн газраа огцруулах хэмжээнд хүртлээ тулсан. Засгийн газраа ч огцруулсан.
Дашрамд дурдахад М.Энхболдыг УИХ-ын сонгуулийн дараагаар Ерөнхий сайд болно гэж харж байсан ч тэрбээр энэ жишгийг эвдэж УИХ-ын дарга болсон. Одоо М.Энхболдын гол алдааг намын дарга байсан мөртлөө Ерөнхий сайд болоогүй гэж үзэж байгаа. Энэ нь засаг төдийгүй намын эв нэгдэл, бэхжилтэд сөргөөр нөлөөлсөн гэдгийг улс төрийн лидерүүд, ажиглагчид хэлж байгаа юм. Энэ үзэл санаа явсаар одоо Нийслэлийн МАН-ын хорооны даргын албан тушаал дээр яригдаж эхэллээ. Нийслэлийн Засаг дарга нь Нийслэлийн МАН-ын дарга байх ёстой гэсэн үг яриа улс төрийн хашир туршлагатай хүмүүсийн амнаас дуулах боллоо. Ингэж байж улс төрийн хийгээд төрийн ажил урагштай явна гэсэн яриа нийслэлийнхний дунд ид яригдаж байна. Энэ яриа хуурай өвсөнд түймэр ассан мэт ид өрнөж байгааг хэлэх байна. Засгийн газраа огцруулахдаа тулсан МАН-ын бужигнааныг нэг толгойтой яваагүйгээс гэж өөрсдөө товчхондоо дүгнэчихсэн. Тиймээс Нийслэлийн намын даргын улс төрийн албан тушаалыг хотын дарга нь авч явах нь зүйтэй гэсэн хувилбарыг дэмжиж буй хүн олон гарч байна.
Тэгээд ч энэ нь байж болох боломжтой хувилбар юм. Үүний өмнө Нийслэлийн намын дарга нь хотын даргаасаа тусдаа байснаас хоёр толгойтой болсон гэлцдэг. Нэг сүүлтэй 1000 толгойтой могойн үлгэр гэдэг шиг. Иргэд нийслэлийн ажилд шүүмжлэлтэй хандах болсон асуудлууд үүсэхэд ч цаад углуургаараа үүнээс болсон гэсэн дүгнэлтийг хийжээ. Тиймээс Су.Батболдыг намын даргаар тавихаар ярьцгааж байгаа гэдэг нь баараггүй болж байх шиг байна. Хотоо ч бодсон ирэх сонгуулиудаа ч бодсон нийслэлчүүдийн сэтгэлд нийцсэн ажлуудыг хийхийн тулд хот маш сайн ажиллах хэрэгтэй болоод байгаа. Ц.Сандуйгаас болж сэвтсэн нэрийг эргээд сэргээж авах хэрэгтэй байгаа. Ийм үед улс төрийн хамгийн оновчтой шийдэл нь намынхаа даргаар Нийслэл хотын Засаг дарга, Улаанбаатар хотын захирагч Су.Батболдыг сонгох нь зүйтэй гэж харж байгаа бололтой.
Гэсэн ч 2020 оны сонгуулийн чимээ ойртож байгаа энэ үед Нийслэл хэмээх том айлын намыг зээмшиж, бууриа засах гэсэн санаархлын өрсөлдөөн энэ намд бас л өрнөх бололтой.
