Барилга хот байгуулалтын яам, Газрын харилцаа, геодези, зураг зүйн газар, Барилгын хөгжлийн төвийн Хот байгуулалт, зураг төсөл, төлөвлөлтийн институтйн газар нар хамтран “Монгол Улсын хүн амын нутагшилт, суурьшлын хөгжлийн ерөнхий төсөл” боловсруулах гэрээнд гарын үсэг зурлаа.

Манай улсын хүн амын тал хувь, аж ахуй нэгжүүдийн 70 орчим хувь нь нийслэл хотод байдаг талаар ярьж байна. Мөн дотоодын нийт бүтээгдэхүүний 65 орчим хувийн Улаанбаатар хотод үйлдвэрлэж байгаа аж. Өмнө нь Барилгын яамны харьяа Барилгын зургийн институт нь улсын бүх зураг тооцооллыг хариуцдаг байсан нь 1995 оноос хойш татан буугдсанаар барилгын салбар судалгаагүй болсон учир энэ онд уг байгууллагын дахин сэргээж, хот байгуулалт, зураг төсөл, төлөвлөлтийн институт нэрээр Барилгын хөгжлийн төв дээр зохион байгуулж байгаа юм байна.

Түүнчлэн энэхүү ажилд улсын хэмжээнд Ерөнхий сайдаар ахлуулсан хороо байгуулагдсан, мөн Засгийн газрын мөрийн хөтөлбөрт тусгагдсанаас гадна Азийн хөгжлийн банктахй хамтран ажиллах гарын үсэг зурсан байгаа гэдгийг онцолж байна. Цаашид НҮБ-аас техникийн туслалцаа авах ажлыг зохион байгуулж байгаа аж.

Ингээд тус төслийн талаар БХБ-ын сайд Х.Баделханаас тодрууллаа.

-Дахин төлөвлөлт, байгуулалтын ажлыг хийснээр ямар ахиц дэвшил гарна гэж харж байгаа вэ?

-Манай улсын хүн амын төвлөрөл хэт их байна. Үүнийг дэлхийд хот төлөвлөлтөөр зохицуулж байна. Нэг ёсондоо Улаанбаатар хотын төвлөрлийг задлан дэд төвүүдийг бий болгон, Монгол орны хэмжээнд газар зүйн цаг уурын байдалтай холбоотой хүн амьдран суурьших боломжтой ямар газар байна гэдэг хэтийн төлөвийг боловсруулж байгаа. Үүний дүнд Монгол Улсын нутагшин суурьшилт, хөгжлийн ерөнхий төсвийг боловсруулна. Боловсруулахын тулд бид Азийн хөгжлийн банкнаас тусламж авна. Мөн НҮБ-аас техникийн туслалцаа авах юм.

-Шинэ хот байгуулах ажил дахин яригдах уу?

-Монгол Улсын хэмжээний хүн амын нутагшил, суурьшлын ерөнхий төслийг Азийн хөгжлийн банк, Дэлхийн банк болон бусад Олон Улсын байгууллагын дэмжлэгтэйгээр дахин зохион байгуулна. Өөрөөр хэлбэл, нийслэлийн төвлөрөлийг багасгана гэсэн үг.

-Нэн түрүүнд байгуулагдах дагуул хот юу вэ?

-Дагуул хотын талаар өмнө нь Засгийн газрын шийд гарч байжээ. Тухайлбал, ШУТИС-ийг Багануурт нүүлгэх ба тэнд нь оюутны хотхон байгуулна гэсэн Засгийн газрын судалгаа, шийдвэр, ерөнхий төлөв гарсан байна. Гэхдээ амьдрал дээр хэрэгжээгүй. Харин өнөөдөр хэрэгжиж байгаа гэвэл Азийн хөгжлийн банк, Европын хөрөнгө оруулалтын банк нар хамтраад нийслэлийн дэд төвүүдийг, инженерийн дэд бүтцийг шийдэх, зарим соёл үйлчилгээний төвийг байгуулах, орон сууц барих төсөл хэрэгжээд эхэлж байгаа. Бид Нийслэлийн Засаг даргатай хамт очин танилцсан юм. Одоо шинэ нисэх буудал баригдвал нисэх буудлыг хүрээлсэн дагуул хот байгуулагдана. Дагуул хотын ерөнхий төлөвийг Солонгос улстай хамтран хийж байгаа.

-Хэдий хугацаанд ойрын дагуул хот ашиглалтад орох вэ?

-Энэ нь өөрөө том ажил шүү дээ. Маш их хэмжээний хөрөнгө шаардана. Эхний ээлжинд Баянхошуу, Сэлбийн дэд төвүүд ойрын хугацаанд ашиглалтад орно. Учир нь  хөрөнгийн асуудал шийдэгдсэн, ерөнхий төлөв нь гарсан тул хэрэгжих боломжтой. Бусад төслүүдийн хөрөнгө нь шийдэгдээгүй төслийн хэмжээнд явж байна.

Б.Лхам